ENTZUN irratsaioa: Gaztesarea.net/irauli

Aste honetan Irauli Uhinaken:

• Nazio Plaza izan dugu hizpide aste honetan Nazio Eztabaida Guneko Eneko Compainsekin [ogg | mp3]
• Alaia Martinek egin digu astearen errepasoa bertsotan [ogg | mp3]
• Larrialdietarako pirulaz hitz egin dugu Larraitz Arando sexu adituarekin [ogg | mp3]

Espainiako hauteskundeen berri jasotzeko eta hauen analisia egiteko Federico apezpikutarra elkarrizketatu dugu gurean.

Sukaldera ere joan gara astero bezala eta Gazte Informazio Agentziako lagunekin asteari errepasoa egin diogu. Gainera, Amaia Agirre bertsolariarekin asteko bertso-kronika osatu dugu. Sexualitatearen atalean “Brikolaje sexuala” izan dugu hizpide Larraitz Arando sexologarekin.

Irratsaioa entzungai Arrosa sareko irratietan astean zehar eta www.gaztesarea.net/irauli webgunean.

- Elkarrizketa entzun: [mp3 | ogg]

Ikasturtearen hasieran Etxegorriko Oier izan da Irauli Uhinak irratsaioan. Berarekin etxebizitzaren problematika aztertu dugu; zertan den egoera, zer alternatiba dauden, zergatik ez diren bideratzen… [www.etxebizitzaeskubidea.net]

Gainera, Hatortxu Rocken izango den eskaintzaz ere hitz egin dugu. Asteburuan errepresaliatuen aldeko oihu bilakatuko da Berriobeitiko zabalgunea.

www.gaztesarea.net/irauli

• AKTUALITATEA: Etengabe gure zilborrari begira gaudela dirudi baina aste honetan ez dugu guk aukeratu. Dignidad y Justicia izena daramaten batzuk Auzitegi Nazionalera eraman gaituzte Kaskagorrikoak eta Gaztesarekoak. Orain txapelokerren ikerketapean gaude… baldintzape horretan egin dugu aste honetakoa. Gaiaz hitz egin dugu Madrilen izan direnekin eta noski, Gazte Informazio Agentziako kideekin astearen errepasoa egin dugu.
• Bertso kronika Andoni Otamendik egin digu aste honetan [ogg | mp3]
• MUSIKAN: KEA taldea ezagutu dugu.
• SUKALDERA ere sartu gara aste honetan eta barazkiak tenpuran egin ditugu [ogg | mp3]
• SEXUALITATEAN: izarapeko aholkuak izan ditugu.

Ogg formatua windows-en entzuteko codec-ak behar dituzu, deskargatzeko klikatu hemen.

irauliuhinakgaztesarea.net

Informazio gehiago:

Lanean jarraitzeko hautua berretsi dute bai Kaskagorrik eta baita Gaztesareak ere

Atzo gauean kontzentrazioa burutu zuten Bilboko Etxebarrieta anaien plazan, iluntzeko 8etan. Bertan ehundik gora lagun bildu ziren, kaskagorri gazte konpartsaren eta Gaztesarearen inputazioak salatzeko. Gaurkoan, agerraldia eskaini dute erasoa salatzeko.

• prentsaurrekoa euskaraz [.mp3] | gazteleraz [.mp3]

• Argazki Galeria

Gaur eskainitako agerraldia

• Tas-tasek jasotako audioak euskaraz [.mp3] | gazteleraz [.mp3]

Kaskagorri eta GazteSarea audientzia nazionalera deitu dituzte

Kaskagorriko eta Gaztesareako kideek uko egin diote Audientzia Nazionalean deklaratzeari

Prentsaurrekoa izan da gaur Bilbon

Lehenik eta behin, Kaskagorritik bat egin nahi dugu Bilboko Konpartsen kordinadorak kaleratutako prentsa-oharrarekin; eta ohar honen edukietatik abiatuta, zera adierazi nahi dugu:

Kaskagorri, Bilboko Gazte Mugimenduaren Konpartsak, jai eta kultura herrikoien alde 18 urte lanean daraman konpartsa da. Bertan, Bilboko gazte mugimendua osatzen dugun gazte espresio anitzak barnebildu izan ditu elkarlanean urteetan zehar. 18 urte hauetan Kaskagorrin parte hartu dugunok ehundaka ekimen burutu ditugu, jolasak, kontzertuak, bazkariak, poteoak, hitzaldiak, jaiak, irteerak… Kaskagorri, egun konpartsero gehien barnebiltzen dituen konpartsa izanik, Bilboko dinamika kulturaletan parte hartzen du: ihauteriak, Aste Nagusia, edota Santo Tomas esate baterako. Horrela, Bilboko jaiak herritarrak bihurtuz joan gara urtez urte, beste konpartsekin batera, udaletxearen inposaketen artean gure alternatiba propioak sortuz.

Urteetan zehar, Kaskagorri handitzen eta hobetzen joan da, konpartsatik igaro diren gazte belaunaldi anitzek erakusten dutenez, gaur egun Bilboko jaietako erreferentzia bat izatera heldu arte.

Eta hau da Asociación Dignidad y Justicia delakoak eta auzitegi nazionalak epaitu nahi dutena, Euskal Herriko kultura eta jai herrikoien alde lan egiten duen gazte konpartsa eteteko asmoz.

Alternatibak sortzeagatik deklaratzera deituak izan gara, aisialdi aukera berriak eskaintzeagatik deklaratzera deituak izan gara, eta gaur egun Bilboko udaletxeak inposatzen digun sistemarekiko kritikoak izateagatik deklaratzera deituak izan gara.

Hori da gure delitua, herriak herriarentzat sortutako kulturaren alde lan egitea. Lan hau euren hitzetan, enaltecimiento del terrorismo eta humillación a las víctimas litzateke.

Baina herri kultura herritik sortzen den moduan, Kaskagorri gazte mugimenduko eta honek daukan lan egiteko grinagatik sortzen da; eta horregatik, bide jonetan lan egiten jarraitzeko gure konpromezua berresten dugu.

Gaztesareako kideak esandakoa:

Kaskagorriren moduan, Gaztesarea Euskal Herriko Gazteon Ataria ere gazte mugimendutik eta gazte mugimenduarentzat sortutako egiteasmoa da. Zentzu honetan, gazte mugimenduaren zerbitzura dagoen tresna da, eta horregatik izan gara hain zuzen inputatuak. Oztopoak oztopo, gazte mugimenduaren zerbitzura egoten jarraituko dugula berretsi nahi dugu.

Bideoak.info

Kontzentrazioko irudi bat

Bilboko Konpartsak-ek adierazpen askatasuna defendatzeko hautua berretsi du

Bilboko konpartsak-en oharra:

Gaur, urriak 23, Audientzia Nazionalera deklaratzera zitatua izan da Inmaculada Basabe andereñoa, daniel portero jaunak Kaskagorri konpartsaren aurka ezarri duen denuntzia baten harira. Denuntzia 2007ko Aste Nagusiko gertaera batzuetan oinarritzen da.

Gertaera hauen aurrean, Bilboko Konpartsak zera adierazi nahi du:

• 1.- Jai herrikoi eta parte hartzaileen defentsa da Bilboko Konpartsak federazioa elkartzen duen maxima.
• 2.-Jai eredu horren identitate zeinuetariko bat adierazpen askatasuna da. Hori dela eta, konpartsa bakoitzak bere ideiak libreki adieraztea defendatzen dugu.
• 3.-Inmaculada izan, edo edozein pertsona konpartsero edota konpartsa izan, Bilboko Konpartsak-etik adierazpen askatasunaren aurkako edozein erasoren aurka gaude.

Agian ez gara EiTBkoak bezain onak, baina desberdinak bai. Ez gara gai egunean 24 ordutan emititzeko, baina astean ordu betean esaten ez dituzten egia asko esateko gai gara. Ez gara izango telebistakoak bezain guapoak, ez dugu izango irrati esatarien tonu sexya, baina gure ahots zakar eta guzti garena bezala azaltzen gara. Gurea ez da beste munduko saioa, baina horrelako gutxi daude mundu honetan… ez gaituzu ezagutzen? Irauli Uhinak gara, astero entzungo gaituzu zure irrati librean edo www.gaztesarea.net/irauli webgunean.

Aktualitatea saioaren ardatza izango da aurten ere. Astean zehar gertatutakoak hartuko ditugu hizpide. Gaztesareko Gazte Informazio Agentzia izaten dugu horretarako iturri, baina errepikatzen ibili nahi ez dugunez, umorez helduko diogu gazteoi gertatzen zaigunaz gain, gazteoi eragiten digunaz hitz egiteko. Aste honetan faxisten ongietorria izan dugu hizpide.

Asteari errepaso poetikoa egiteko asmoz Bertso Kronika gehitu diogu gure saioari, bertsotan entzun ahalko dugu asteak utzi diguna. Nola ez Musikaleri jarraipena egingo diogu, astero talde berriak aurkeztuz eta bertsolaritzaren atala eta Izarapeko aholkuak izango dira.

Kulturaren atalean ere gazte sortzaileak ezagutzen saiatuko gara.

Aurten lehio berria ireki nahi dugu komunikazio proiektu gazteentzat. Astero herri ezberdinetan garatzen ari diren komunikazio proiektuei ahotsa emango diegu, euren hitzetan konta diezaguten zer den egiten dutena (irakurle, komunikazio proiekturen baten bazabiltza jarri gurekin harremanetan mesedez: irauliuhinak@gaztesarea.net ).

Beraz badakizu, zerbait ezberdina nahi baduzu, gehiegitan ezkutuan geratzen diren kontuak entzun nahi badituzu; edo besterik gabe, gurekin edo gutaz barre egin nahi baduzu… astero www.gaztesarea.net/irauli webgunearen bitartez edo zure inguruko irrati librean entzun ahalko gaituzu.

Laguntzeko prest baldin bazaude, Irauliren lan taldean parte hartu nahi baduzu, edo aldian behin laguntzeko prest bazaude… beso zabalik gaituzu zure zain. Idatzi iezaguzu: irauliuhinak@gaztesarea.net

La otra-ren diala

Regeneración Radio Kronika honetan Mexikoko brigadak leku ezberdinetan topatutako irrati libreei erreparatu dio.

Bakoitza nola sortu zen, zertan ari diren, nola funtzionatzen duen… Bide horretan agertzen da tartekatua Gobernuaren errepresioa, desalojoak, egungo egoera… eta nola ez ‘La Otra’ kanpaina, besteak beste, hain zabala, anitza eta konplexua den Mexikoko ezker eta beheko mugimendu, irrati libre, kolektibo eta aberren topagune, eta bateratze gunea dena.

Herri gehienetan gertatzen den antzera, hemen ere, gure Mexiko DF-n, komunikazioa estatuaren monopolio hutsa bilakatu da. Eragile sozialek eraldaketarako duten grina itotzeko asmotan, estatuak bultzatu zein kontrolatutako hedabideetan ez dute inolako lekurik aurkitzen ez aurkituko sistematik at aurkitzen diren heinean, horregatik ezin bestekoa da alternatibak bilatzea, ahots gabe gelditu diren garrasi mututuei bide emateko asmoan. Hala ere, etsaia beti etsai, komunikazio aukera hau mandatarien jo puntuan aurkitzen da, edozein bide erabiliz horrenbesteko min egiten dien kaleko mezua isildu nahian; irratien desajoloak izan daitezke, dialean daukaten esparrua murriztea, hedabide hauen kriminalizazio zein difamazioa…

Hala ere aurrera doaz, irratiak sortzen, paperezko soportetan kaleratutako materialak, ikus entzunezko ekoizpen edo edizioak… Honen adibide garbia izan daitezke, Radio Espiral, Acapatzingoko (FPFVI-UNOPII) komunitate barnean dagoen irratia, Regeneracion radio, oraindik Radio Pacheco moduan ezagutzen dena, Ke huelga radio, UNAMeko grebaren ostean (1999) eraiki edo sortutako irratia, Centro de Medios Libres egitasmoa, komunikazioa bizitzeko era bat moduan ulertzen dutenak eta imajina ditzakegun esparru zein soporte guztiak erabiliz ahots bakoen oihartzuna bilakatu dira, Mexikon dauden beste hamaika egitasmo edo kolektiboen antzera.

Egoera edo koiunturak bultzatuta, hedabide hauen jaiotza estatuak erabilitako errepresioaren ondorio zuzena dira gehienetan, Ke Huelga! Irratiarena adibide garbiena izanik. UNAMen 1999. urtean eman zen greba isildu nahian, estatuak erabilitako errepresio bortitzaren ondorio zuzena baita. Estatuak, Unibertsitatea guztiz pribatizatu nahian, irakasleek baina gehien bat ikasleek greba bateri ekin zioten, erreforma legea ekiditu nahian. Azken finean estatuaren erreforma lege hura etorkizun hurbil batean lehenengo pertsonan pairatuko zutenak, hortzak erakusteko prest agertu ziren. Egun haietan bizitako errepresioa, ia 1000 pertsona atxilotu eta kartzelaratuak izan ziren, faktore garrantzitsu moduan har genezake, irratiaren gaurko egoera ulertzeko. Seudonimoen bidez egiten dituzte beraien programak, segurtasun moduan, desalojo arriskuan dagoen irrati honetan. Dirudienez min larregi egiten dio estatuari, gaur egun 2kmtara mugatuta duen emisio esparruko hedabidea.

Radio espiral, hasieran Radio Bocina moduan ezagutzen zena, beste egoera baten baitan jaio zen, FPFVI-UNOPII bultzatutako komunitateen barruan. Jaiotzaren egoera ezberdina izan arren, Ke Huelga! Irratiarekin alderatuta, bien xedea berdintsutzat har genezake, mundu mailako zein Mexikoko borrokak ezagutaraztea, eta lehen esan dugun moduan sistemaren barnean dauden hedabideek ahots gabe utzi dituzten guzti horien bozgorailua bihurtzea. Komunitate hauen barne proiektuaren beste zatitxo bat besterik ez dela esan genezake, hala ere Radio Espiralaren lana komunitate zein komunitate hauetatik at dagoen edozeinengana heltzea eta beraien diskurtso propioa zabaltzea izanik, merezi duen garrantziaz ikusi behar da. Regeneracion radio, gaur egun oraindik radio pacheco moduan ezagutzen den irratia, CCH Ballejon (CCH-ak Euskal Herriko batxilergoarekin alderatu genezake) kokatuta dago, leku txikitxo baten barnetik komunikazio alternatiba bat bultzatu eta sustatuz. Desalojo arriskuan aurkitzen dira gaur egun, iraganean difamazio zein estatuak erabilitako kriminalizazio kanpainen gatibu izan den irratia. CMLkoekin elkarlanean ibilitakoak dira, komunikazioa bizitzeko era baten moduan ulertzen duen egitasmoa, azken finean, edozein gauzarik nanoena ere komunika dezake eta. Leku fisiko baten premia sumatu zuten, egitasmo honen baitan aurkitzen ziren kolektiboetako militanteak, beraien proiektu komunikatiboak aurrera eraman eta hedatzeko orduan. Espazio fisikoa topatuta 3 urte inguru egon ziren bertan, ikus entzunezko zein paperezko materiala ekoizten, fm-tik zein internetetik (gaur egun) emititzen, eta komunikazio ekintza zuzenera deitzen, pintada zein imajina ditzakegun metodoak erabiliaz. Ekologiaren beharra ikusi zuten, grisutako hiri honetan orlegi kolorea faltan botatzen zuen kolektiboa sortuaz, la azotea verde sienes ezagututa, han eta hemendik loretxoak landatuz. Trukerako balio izan zuen esparrua, kanpoko lagunen hostala, edo serigrafia zein tailer andanen topagunea izan zen bilgunea. Gaur egun beraien material-biltegi guztia Chanti Ollin okupatutako etxean aurkitzen da, behin-behineko erabaki bat izanik, behin-betiko gune bat topatu bitartean. Hedabide guzti hauek asanblearioki estrukturatzen dira, gehienak ezagutu edo elkarlanean ibilitakoak dira, horregatik ez da bat ere zaila izanen ulertzea La Otraren baitan egotea, La Otran atxikitu direla alegia. Beraien hedabideak errealitatea fokalizatzeko tresna izanik, ahots bakoen bozgorailua izanik, gizartearen eraldaketaren bidean egonik, ez da harritzekoa La Otraren esanekin zein proiektuarekin bat etortzea, Kapitalaren aurka ireki den borroka honetan partaide aktibo bilakatuz. La Otraren baitan atxikituta dauden, ezagutzen ez zituzten beste erakunde edo kolektiboekin esperientziak trukatzeko, elkar ezagutzeko edo solasean ibiltzeko parada eman die kanpaina hau, bakoitzak bere matizekin, baina denak ente bakar bat sortuaz, kapital anker hau gogor kolpatzeko asmotan. Eraiki egiten ari den sareari erabateko garrantzia ematen diote, eta ez da harritzeko, Mexikon aurkitzen diren milaka giza eragileen siglen itsasoan galdu eta itotzea ez da bat ere zaila, kohesio falta bat sumatzen delarik, eta hori da nolabait ere la Otraren xedeetako bat, ezkerrean eta behean aurkitzen edo kokatuta dauden kolektibo horiek elkar ezagutzea eta ahots bakar batez, kapitalaren porrot politiko-soziala bermatzea.

2007ko uztaila. Mexikorako brigada.
Askapena

• Entzun elkarrizketa [ mp3 |ogg]

Urtarrilean SEGI terrorista izendatu zuten, mobilizazio ugari izan zen epaia salatzeko

ETAk su etenaren amaiera iragarri ostean politikari ugariren ahotsak dira nagusi hedabideetan eta aurrera begirako asmo berrien inguruko usteak, asmoak eta zalantzak ageri dira. Segi gazte antolakundeko Mattin Elortzarekin hitz egin dugu egoeraren gakoak aztertzeko.

Galdera.- Zer uste du Segik, zer esan nahi du honek?

Erantzuna.- Lehenbizi guk ere aipatu nahiko genuke gizartearen gehiengoak bezala kezkaz bizi dugula iragarpen hau. Baina iragarpen honek erakusten du prozesu demokratikoak krisi egoera bat bizi duela. Hala ere, ate asko irekita daude krisi hori gainditzeko eta aukerak badirela eman nahi dugu aditzera.

G.- Baina, prozesua amaitu egin dela diote gehienek.

E.- Guk ez dugu iritzi hori konpartitzen eta hanka sartze larria iruditzen zaigu irakurketa hori egitea. Azken batean, prozesua hasi zenean Euskal Herriak arazo politiko bat eta arazo armatu bat bizi zuela denok konpartitzen genuen. Beraz, argi genekien arazo politiko horri irtenbidea aurkitzean konpondu ahalko genukeela bi aldeok pairatzen dugun arazo armatua. Ondorioz, prozesu baten hasiera edo bukaera ETAren erantzukizuna dela esatea ez dugu konpartitzen.

G.- Baina egia da orain 14 hilabete erakundearen agiriarekin ilusioa piztu zela. Orduan ere zaila zela esaten zen baina bazirudien helburu handiak lortzeko aukerak sortzen zirela.

E.- Guk gehiago ikusten genuena zen prozesua hasi aurretik dagoeneko Euskal Herriko eragile, alderdi politiko eta sindikatu ezberdinen artean Euskal Herriaren eskubideen inguruan lan harreman bat garatzen hasia zela. Baldintza horiek izanik aukerak sortzen ziren Gobernuarekin negoziaketetan urratsak emateko, Euskal Herriari zor zaion autodeterminazio eskubidea eta lurralde zatiketaren gaindipenerako urratsak emateko. Marko demokratiko berri batetik bakoitzaren proiektu politikoa garatzeko eta normalizazio egoera batera iristeko.

Erakundearen su eten amaiera batekin ez da ulertu behar prozesuaren haustura

Baina azpimarratu nahiko nuke Erakundearen su eten amaiera batekin ez dela ulertu behar prozesuaren haustura. Azken batean, hemen erakunde armatua terroristatzat eman nahi dute etengabean, baina argi geratu da Erakunde honen existentzia herri honen eskubideak berreskuratzearen bidetik sortu dela; nahiz eta batzuek etikoki eta moralki zilegitzat ematen ez duten, arazo politikoa duen herri baten ezin zaio protagonismoa eman borroka armatua daraman erakundeari, bakoitzak autokritika egin behar du zer egin duen eta zer jarri duen mahai gainean eta hausnartu behar du aurrerantzean zer egingo duen; arazoa eskubideen urraketatik eratortzen baita.

G.- Baina egia da Erakundearen agiriak finikito itxura ematen diola… edo hori ulertu dugu…

E.- Guk ez dugu ezer amaitutzat ematen. Guk argi duguna da erakundeak iragarri duen moduan, eta ezker abertzalean esaten ari garen moduan, momentu honetan akordio politiko bat posible dela eta posible denez gure eskura dauden bitarteko guztiak jarriko ditugula hori posible izan dadin. Aldiz, ez gaude prest bestelako iruzur bat onartu eta hori asumitzeko. Horren alde egiten badute parean izango gaituzte tinko. Baina uste dugu akordio politikoa lortzeko ezker abertzaleak bere proiektu politikoa baztertu eta herri ikuspegi batetik gatazkaren konponbiderako proposamena jarri duela mahai gainean.

Proposamenak jasotzen du Euskal Herriak mendeetan zehar pairatzen duen lurralde zatiketa gainditu eta euskal herritarrek nahi dutena erabakitzeko eskubidea izan dezatela, hor ateratzen den emaitza Gobernu espainiarrak onartzeko bere legalitatean aldaketak egiteko konpromisoa hartzera bideratuz.

Gure ustez norabide horretan oraindik bidea luzea da, ezin da pentsatu mendeetako gatazka bat urtebetean konponduko denik. Asko dago egiteko baina ez dago ezer amaituta; konpromisoa eragile politiko, sozial eta sindikalek dute. Hor lortzen den hitzarmena onartzera behartuko baiditugu espainiarrak, frantsesak eta traizioa egin diguten PNV bezalako euskal alderdiak, gehiengoaren nahia errespetatzera behartuko ditugu.

G.- Badira asteak esaten ari zaretela ezetz esan diotela PNVk eta PSOEk akordio politikoari. Nahiko ezkutuko kontuak izaten dira, zer gertatu da?

E.- Ezker abertzaleak proposamen bat mahaigaineratu du lurralde zatiketa gaindituz eta erabakitzeko eskubidea proposatuz. Parean ez da bestelako proposamenik izan, besterik izango balitz aztertuko genuke baina ez dute horretarako ere adorerik izan. Beraiek badakite Espainiako Konstituzioaren araberako proposamen batek ez duela gatazka konpontzen, eta PNVk badaki zatiketa mantentzen duen proposamen batek ez duela gatazka konpontzen. Orduan, ez dute proposamenik mahaigaineratu eta gureari ezetz esan diote. PNV eta PSOE saiatu dira eremu teknikora eramaten eztabaida, gainditua den indarkeriaren inguruko eztabaidari helduz. Guk autokritika bat egin ahalko genuke, behar bada, ezkutuan izan diren negoziaketa horien berri izateko beharra zuelako herriak.

PNV eta PSOE saiatu dira errepresioaren bitartez eduki politiko horiek ezkutatzen eguneroko gaiak presoen eta atxiloketen ingurukoak izaten. Horrek baldintzatu du eztabaidaren muina herritartzeko gaitasuna.

Ezker Abertzaleak bere proiektu politikoa albo batean utzi du negoziaketa politikoetan eta herriaren nahia ordezkatu du

G.- Esan duzue PSOEk eta PNVk ezetz esan diotela akordioari. Beraz, orain ezetz esan badute, zergatik esango dute geroago baietz?

E.- Ezker Abertzaleak bere proiektu politikoa albo batean utzi du negoziaketa politikoetan eta herriaren nahia ordezkatu du. Lehentasuna gatazka gainditzea delako. Ezker abertzaleak negoziaketa politiko horietan ordezkatu duena gehiengo sozialak nahi duena da. Inkestek, eta hauteskundeek ere, erakutsi dute euskal herritar gehienok nahi duguna gure erabakitzeko eskubidea errespetatzea eta lurralde zatiketa gainditzea dela. Sinesten duguna da, proposamenaren edukiak herri guztietara zabaldutakoan, herriak bere egiten dituenean eduki horiek, aktibo bat bilakatzen denean, ezingo dutela gehiengo sozialaren aurkako politikarik egin. Ezin diogu garrantzia handiegirik eman paper batean sinatzen denari, paper batean sinatzen dena ere apurtu baidaiteke, eta beraz, herria da gure garantia bakarra eta herriarekin eraiki behar dugu prozesua.

G.- Baina badirudi, negoziazioak amaitu direla. Anoetan proposatzen ziren bi negoziazio karrilak amaitu direla dirudi?

E.- Bai, hala da, baina aipatzen nuen moduan, uste dugu borrokaren bidez zabaldu zela orain hamalau hilabete sortu zen aukera, borrokaren bidez baldintzatu dugu estatua. Beraz, uste dugu borrokaren bidetik lortuko dugula baldintzatzea eta aukera berriak zabaltzea.

G.- Aurrekoetan bezala, ordea, negoziazio horietan gertatzen zenari begira izan gara herritarrok… zein zen, eta da, herritarron papera?

E.- Nik uste dut herritarrok duela pare bat urtetatik antolatzen ari garela. Badira dinamika batzuk (Milaka Bilaka edo Ahotsak) norabide horretan. Gehiengoak argi du konponbidea elkarrizketa eta akordioaren bitartez etorriko dela, azken batean, arazoa politikoa delako. Guk argi duguna iniziatiba horietan murgildu egin behar dela, gehiengoaren nahia hori bada onartu egin beharko duelako PNVk, eta baita PSOEk ere.

G.- Etsipen mezuak entzuten dira hedabideetan… dena bukatu da, lixto ez dago zer eginik… halakoak, baina baikor nabari zaituztet…

E.- Guk pentsatzen dugulako, azken batean, inori itxaron gabe gure eskubideak direnak gure egin behar ditugula. Horretan dihardugu eta horretan jarraitu behar dugu. Guk bestelako herri eredua nahi dugu, herri askea nahi dugu eta urratsak ematen jarraitu behar dugu norabide horretan. Adibidez, ikastolek garrantzia handia izan zuten bere garaian; horrekin alternatiba eraikitzeaz gain zapalkuntza agerian utzi zen eta egungo sistemak baliogabetzea eragiten zuen eta horrek ideologikoki izugarrizko aurrera pausua suposatu zuen.

Norabide berean, gazte mugimenduari dagokionean, lan asko egiten da gaztetxeetatik edo komunikazio proiektu propioak eraikitzen, kultur eremuan ere badira iniziatibak? hori da bidea, egungo sistemaren topeak agerian utzi eta nahi dugun herri eredu hori gaurdanik eraikitzen hastea. Nik uste horrek izan behar duela bidea eta horretan egin beharko genuke indar.

G.- PNV, PNV eta PNV. Ezker abertzaleko antolakunde guztietatik haserre bizia nabari da Imazen alderdiarekiko?

E.- Bai, eta baita ezker abertzalea gainditzen duten eremu sozialetan ere, horietan ere PNVrekin nazkatuta dira eta hori hauteskundeetan ere argi ikusi da. Azken batean, PNV egin duen apustu estatalista pairatzen ari da orain. Zabaldu den aukera historiko honetan PNVk muzin egin dio, PSOErekin elkarlanean aritu da etengabean, eta ez du lotsarik izan Josu Jonek PPrekin ere joateko prest dagoela adieraziz.

Agerikoa da PNVk bi korronte dituela, ikusten dugu posible dela hor ere jende zintzoa izatea, baina agerikoa da ere beste batzuk euren poltsikoari eta diruari soilik begiratzen diotela. Adibidez AHTarekin, superportuarekin, erraustegiekin… kapitalismoaren aldeko hautu garbia egiten ari dira. Guk ez diogu inola ere utziko PNVri trantsizioan egin zuen moduan iruzurraren bidetik joaten.

Polizia Autonomikoak gazteriaren eskubideen defentsan Donostian egindako manifestazioa desegin zuen [2007-02-10]

Baina, gazte mugimenduan egunerokoan zipayismo politikoa deitzen diogun horretan ongi hezituak izan gara tamalez. Kapitalismo horren aurka gauden gazte ezberdinok, bestelako eredu sozialista baten aldeko hautua egiten ari garenean gaztetxeetan edo beste mila esparrutan errepresioa da eguneroko ogia. Bai manifestazioetan, kartelak jartzerakoan isunak, jipoiak, gaztetxeen desalojoak eta abar. PNVk gazte eremuan ez du ezer ordezkatzen eta gazte mugimenduari dagokionean bere eragina hutsaren hurrena da.

PNV ez da gai izango duk mahai gainean proposatu dugunari ezetz esan diola jendaurrean aitortzeko

G.- Agian aurpegi okerrena erakusten dio gazteriari baina, lehengora bueltatuz, mahaiean proposamenari ezetz esango zion baina jendartearen aurrean alderdi abertzalea izaten jarraitzen du. Nola sinetsi genezake noizbait PNVk estatuari aurre egingo diola erabakitze eskubidearen alde?

E.- PNV ez da gai izango duk mahai gainean proposatu dugunari ezetz esan diola aitortzeko. Ez da gai lau herrialdeak batuko dituen proposamenari jendaurrean ezetz esateko. PNVri espazio politikoa amaitu zaio. Guk galdegingo genioke ia prest dagoen PNV bere oinarri sozialarengana, PNVko militanteengana joateko eta azaltzeko ezker abertzaleak mahaigainean jarri duen proposamenari ezetz zergatik esan dion. Proposamena ezagutarazten dugunean herrietan, PNVko militanteek, eta bizkarzainekin dabiltzan PSOEko askok ere, ikusten dutenean euren bizitzak baldintzatua jarraitzen duela eta konpondu ahal zela, eta konponbideari euren ordezkariek uko egin diotela aukera horri… nik uste orduan arazo larria izango dutela bai gizartean, baina baita euren alderdietan bertan ere.

G.- Eta PSOE? Zapatero? Talantearen gizona zen, baina faxista deitu dio Erakundeak azken agirian, berari ez bada berak gidatzen duen Gobernuari…

E.- Denek bagenuen espektatiba bat, bere burua proiektatu zuen Espainiara bakea eramango zuen gizon gisa. Baina hilabete hauetako bilakaera aztertuz gero ez dugu inolako aldaketarik ikusi aurreko Gobernuko presidenteekin alderatu ostean, azken batean torturak, atxiloketak, legez kanporatzeak, auzitegi nazionalera joan-etorriak? Hori guztia ez da ulertzekoa konponbide prozesu batean. Guk uste dugu horrenbeste erabiltzen duten PPren izu horrek ez duela jada balio Euskal Herrian. Egin zezaketen guztia egin dute, ez dakit zer gehiago egin ahalko luketen… ez bada laurogeigarren hamarkadan sortu zituzten talde paramilitarrak eratzea.

Aukerak zabalik jarraitzen du estatuaren berregituraketa hori oraindik eginbehar bat delako eurentzat

G.- Beraz, zertarako sartu da PSOE halako prozesu batera?

E.- Guk uste duguna da Espainia Estatu gisa krisi egoera batean dagoela, arazoa ez dela Zapaterorena edo PSOErena, horiek estatuaren ordezkariak besterik ez dira, azken batean. Estatuak duen krisiari aurre egiteko barne egituraketa aldatzeko premia du eta aldaketa horretan dagoeneko Katalunian eta Andaluzian urrats batzuk eman ditu, eta orain Euskal Herrian ere lurralde zatiketa mantenduz eta erabakitzeko eskubidea ukatuz prozesu hori itxi nahi du. Baina hor sortzen da prozesu baterako aukera Euskal Herriarentzat, egin nahi duen estatu egitura hori amaitzeko gatazka politiko eta armatu honekin amaitu beharra dauka. Guk uste dugu aukera zabaldu zela norabide horretan eta aukera horrek zabalik jarraitzen duela estatuaren berregituraketa hori oraindik eginbehar bat delako eurentzat.

Negoziazio politikoak hasi zirenean ezker abertzalea ahultzeko sineskerietan ere baziren, agian, baina edozein dela egoera ere ezker abertzaleak tinko jarraitzen du. PNVrekin elkarlanean hirugarren bide bat ireki nahi izan dute, ezker abertzalea baztertuz. Uste dugu oso kalkulatua izan dela ANV-EAE hainbat herritan legez aurkeztu ahal izatea eta beste batzutan ez, prozesu demokratikoa baldintzatzeko asmoz egin dutela hori, prozesu estatalista bat garatzeko eta ez euskal herritarron eskubideetan oinarritutakoa.

Txinaurri lan horretan dihardugu herrietan eta hori ez da eteten errepresioarekin, hori geldiezina da

G.- Irakurketa errealistak egiten dituztenek diote hau bezalako porrotak gainditzeko gai ez dela ezker abertzalea; baina ez dakit, behin eta berriz esan arren ez da betetzen?

E.- Ba begira, berriki G-8aren aurkako protestetan izan gara beste eragile eta alderdi independentistekin batera Alemanian eta han jaso genuen ETAren iragarpenaren berri. Han denek aipatzen ziguten ia erotuak ginen, horrelako baldintzetan aurrera segitzerik bagenuen? eta guk han esaten genien moduan, hemen ere esan dezakegu, borrokaren balio hori ezker abertzaleak ez duela inoiz galduko.

Bilboko La Esperanza pilotalekuan itxialdia egin zuten Jarrai, Haika eta Segiko auzipetuek; espetxera eraman zituzten hortik

Aspaldi ondorioztatu genuen antolatuz eta borrokatuz baldintzatu egiten genituela etsaiak eta horrek gure eskubideak lortzeko aukerak eskaintzen zizkigula. Txinaurri lan horretan dihardugu herrietan eta hori ez da eteten errepresioarekin, hori geldiezina da, nik uste hori Euskal Herrian odolean daramagula. Nahiz eta errepresioaren gordina bizi sentimendu kolektibo hori ezin da baldintzatu.

G.- Batzutan badirudi gazte mugimenduaren lana eta prozesu demokratikoa bezalako izenburu potoloa duten eremuak elkarrengandik urrun daudela… zuek ezetz diozue.

E.- Ez dira batere urrun. Lehen galdera bati erantzuterakoan, aipatzen zenidan herritarrok zer egin behar genuen, zein espazio geratzen zitzaigun. Nik uste dut gazte mugimenduan eredugarriak izan gaitezkeela euskal jendartearentzat. Hor garatzen ari garen hainbat proiektuk erakusten dute zapalkuntza zenbaterainokoa den, eta erakusten da ere bestelako Euskal Herria eraikitzea posible dela. Askotan sinestarazten saiatzen dira Euskal Herri independenteak ez lukela behar adinako gaitasunik egoera horri aurre egiteko eta halakoak. Baina esan behar dugu zapalkuntza egoera batean hainbat proiektu garatu dituela herri honek, beraz pentsatu egoera normalizatu batean zer egiteko gai izango ginatekeen.

Nik uste dut horregatik direla beldur, horregatik ez dute onartzen ezker abertzaleak termino demokratikoetan aurkeztu duen proposamena, aukera berdintasunean independentziari ate bat irekiko geniokela badakitelako; eta hain utopiko bihurtzen saiatzen diren pertsona horiei erakutsi ahalko genieke Euskal Herri independiente eta sozialista inoiz baino hurbilago dugula.

Akordioa termino demokratikoetan egiten bada akordioa posible da, eta orain indarkeriaren eztabaidan sartzen ari dira aukera horri bidea itxiz

G.- Iruditzen zait, elkarrizketa hau orain bi aste egin bagenu antzekoak izango zirela erantzunak, alegia, ez dela horrenbeste aldatzen egoera?

E.- Ba arrazoi duzu. Komunikabideek momentu batean ere, komertzioak bezala, saltegiak dirudite. Orain ETAk egindako iragarpenarekin mundua bukatu dela dirudi. Nik uste nahitara egiten dutela gizarteari atsekabea sorrarazi nahiean, baina errealitatea bestelakoa da.

Baliatu nahiko nuke kritika bat egiteko alderdi abertzale orori, eta gainontzekoei ere. Eurak dira etengabean ETA marginatu egin behar dela diotenak, eta eurak dira lehenak ETAri hainbesteko garrantzia ematen diotenak. Nik uste dut hor hanka sartze larri bat egiten ari direla, hemen arazo politiko bat baldin badago horri egin behar zaio aurre, horretarako mahai bat eratu beharko da, elkarrizketarako bideak zabaldu beharko dira, akordioa termino demokratikoetan egiten bada akordioa posible da, eta orain indarkeriaren eztabaidan sartzen ari dira aukera horri bidea itxiz. Espainiako Estatua horretaz baliatzen ari da etengabean.

G.- Beraz, Segik zer egingo du aurrerantzean?

E.- Udarara begira, hedabideek eta alderdi politikoek egiten duten manipulazioari aurre egin asmoz errealitatea zer den azaltzea da gure helburua, 14 hilabetean gertatutakoa azalduz. Aurrerago begira, baikor gaude eta uste dugunez elkarrizketaren bidez akordioa lortu daitekeela termino demokratikoetan, gu prest gaude horretarako eta horren alde lanean jarraitzeko konpromisoa dugu. Ezker Abertzaleak PNVri eta PSOEri egin dioten proposamena herrira jaitsi behar dugu, badakigulako jendearen gehiengoak bat egin duela horrekin eta PNVko eta PSOEko agintariek ezingo diotela aurre egin horri. Beraz, aukerak irekiko direla berriz negoziazioari heltzeko.

Denei dei egiten diegu borrokatzen jarraitzeko, borrokaren bidez soilik ireki ahalko baiditugu aukera berriak.

Berretsi nahiko nuke euskal herritar guztiek alboratu dezatela etsipen joera eta argi ikus dezagula gure eskubideak eskuratzeko une aproposenean gaudela. Euskal Herria ofentsiban dago, nahi izan ezkero hirugarren bide horri heldu, amore eman eta iruzurra onartuz sinatu ahalko genuke akordio bat, baina helburua ez da hori, helburua gure eskubideak eskuratzea da. Posible da, gehiengoaren nahiarekin konektatzen duen proposamena zehaztua dagoelako, eta posible izanik, guztion ardura da borrokan jarraitzea. Haiei esango diegu, gurea dena eta Euskal Herria nazio gisa aitortzen ez duten bitartean, eta herritarrek nahi dutena erabakitzeko aukera ez duten bitartean jai izango dutela gurekin eta parean izango gaituztela.

Entzun elkarrizketa: [mp3 |ogg]

Milaka pertsona bildu dira Rostocken neoliberalismoari aurre egiteko

Milaka pertsona hurbildu dira munduko zortzi ekonomia garrantzitsuenen agintariei eta eurekin doan espekulatzaile eta lapurren sekitoari merezi duten ongietorria ematera Alemaniara, EHtik ere bai. Gaztesarea eta Xirika ere kontragailurreko ekitaldietan parte hartzen ari dira. Segi gazte erakundearen ordezkaritza bat ere bertan da “G8, entzun euskal gazteriak esateko duena: Amaitu jatzue txollue!!!” adierazi dute.

XiriKZ:

Polizia eta manifestarien arteko iskanbilak

Irudimena, borroka, sua eta ura

Alemania iparraldeko Heligendamm herriak, munduko 8 herrialde industrialki
garatuenetako, hots, G8 famatuko ordezkariak hartuko ditu. Iyan ere,
munduaren jabe talde horrek, bilera egingo du ekainaren 6 eta 8an, Afrika
eta berotze globalaren inguruan, hazkundea eta erantzukizuna hizpide izango
dutelarik. Ohikoa den legez, ezkerreko mugimendu andana bildu dira
boteredunen gailurra ahal den neurrian oztopatu eta baldintzatzeko asmoz eta
horretarako, Berlinetik 250 km inguru iparralderantz dagoen Rostock hiriaren
ingurumarietan batu dira ekimenei tartea zabaltzeko.

Ekimenen artean, hitzaldiak, eztabaidak, kontzertuak, bideo emanaldiak eta
nola ez, manifestazioak daude eta beren artean kokatzen dira baita euskal
ordezkaritza ezberdinetatik abiatutakoak. Izan ere, Segi gazte erakundeak,
Askapenak, Askatasunak eta Batasunak hitzaldiak antolatu dituzte G8a sitiatu
nahi duen Rostock Kanpalekuan nazioarteko elkarlana bideratuz, Euskal
Herriaren gatazka egoeraren berri eman eta eragile ezberdinen artean
harreman sarea era praktiko batean indartzeko asmoz.

Alemania osotik etorritako ezkerreko mugimenduak izan dira azpiegitura eta
ekitaldi nagusien antolatzaileak. Gogora ekartzekoa da aipatu ezkerreko
mugimenduek maiatz hasieran batez ere jasan izan duten jazarpen bortitza,
Angela Merkel presidentearen eskubiko eskua den Barne Ministroaren aginduz,
20 lagun atxilotu baitzituzten aparteko legeria aplikatuz eta G8aren aurka
atentatzeko zelula terrorista eratzen saiatzea leporatuz. Lege
antiterroristaren baitan kokatu dute ekinbide poliziala egunotarako eta
beraz ia arnasa hartzea ere debekatu egin dute. Aparte, G8aren aurkako
lantaldeak antolaketarako erabiltzen zuen interneteko ataria itxi egin
zuten.

Bestalde, atzo (larunbata) izan zen lehen manifestazio nagusia. Mundu
guztitik etorritako ekintzaile eta eragileek hartu zuten manifestazioari
hasiera ematen zion Rostoceko tren geltoki pareko enparantza. Lehen
inpresioari soilik jarraiki, irudimena eta borrokarako grina izan ziren
arnasteko lehen pertzeptzioak. Antolatzaileen esanez, 50.000 lagun inguru
bertaratu ziren ekimenera baina begien aurrekoak ez zuen hori esaten, jende
andana ikusten baitzen nonahi. Poliziak ere nonahi ikusten ziren (inoiz ez
dut hainbeste txakur ikusi nire bizitzan, ikusi ditudan guztiak batuta ere).
Kilometro pasatxoko kale nagusia, ezker eta eskubi, ehunka polizia
furgonetaz sitiatuta zegoen eta edozein eraikin ofizialen inguruan,
segurtasun neurriak gehiegizkoak ziren.

Jaigiroan hasi zen manifestazioa eguerdiko ordubatak aldera, Rostockeko tren
geltoki paretik eta lau km inguruko ibilbidea egin zuen Stadthafeneraino
(hiriko kaia). Bertan, arratsaldeko hiruak aldera, beste bloke batetik
abiatutako manifestazioarekin batu behar zen baina bat egiterako istiluak
hasiak ziren jada. Alemania guztitik etorritako zaunkariek manifestazioaren
kontra egin zuten eta ibiltarien buruak ezin izan zien aurre egin 50naka
zetozten polizia zelulei. Euskal delegazioa zetorren Revolution taldekoen
blokea izan zen txakurrak geldiarazteko gaitasuna izan zuten lehenak eta
hortik aurrera hasi zen guda bortitza.

Euskal Herrian ezagutzen denaren aurka, poliziaren jokabideak manifestarien
desgastea bilatzen zuen. Behin eta berriz manifestariak zeuden guneen
erdi-erdira sartuaz, ekintzaileak elkarrengandik urruntzea bilatzen zuten.
Beraien aurrean, zahar eta gazte, elkarri besotik helduaz, erresistentzia
kordoiak eratzen ziren nonahi eta zaunkariek izerdi askotxo galtzen zuten
zerbait lortzerako. Manifestari guztien artean, espreski aurrez-aurreko
borrokarako prest zetozen milaka gazte bildu ziren. Guzti-guzitak burutik
oinetaraino beltzez jantzita, betaurreko beltzekin, mailuekin eta
eskularruekin, lurra altxatu eta metro batetik polizia konboiei erasotzen
zieten ; hala ere, beren aurka zetorren 2 kilo inguruko harriari, buruarekin
joaz eta harria apurtuaz erantzuten zioten armaduraz jantzitako poliziek.
Alemaniako hedabideen esanetan, 1000 polizia gutxi gora behera zauritu ziren
atzoko istiluetan.

Harri euriak ez zuen atertzen eta zaunkariak larri zebiltzan ; helikoptero
baten bidez, manifestarien urrats guztiak kontrolatzen zituzten airetik, eta
borrokara lotutakoak, ke beltza ateratzen hasi ziren. Poliziren autoen
kontra ezer gutxi egin zezaketen barrikaden atzean jende mordoa zegoen eta
istiluek bere gordintasunean jarraitzen zuten arren, manifestazioa

Informazio gehiago beste hedabideetan:
euskalherria.indymedia.org

www.antig8.tk

Segi gazte erakundearen oharra:

G8 entzun: Amaitu jatzue txollue!!

Datorren astean, Ekainaren 6tik 8ra bitarte Heiligendam hiri alemanean biltzekoak dira mundu osoko zortzi potentzia nagusienetako ordezkariak. Bertan eta hazkundea eta erantzukizuna izenburupean Afrika eta berotze globalaren inguruan arituko dira eztabaidan; Afrika gabe…

Heiligendametik 20 bat kmra aldiz, Rostock izeneko hirian, mundu osotik eta batik bat alemaniatik hurbilduriko 50.000 aktibista ezketiar inguru bildu dira. Horien programaren izenburuan, hain ezaguna egin zaigun beste mundu bat posible da leloa, eta topaketen helburua, Seattlen hasi eta Genovan bere puntu gorena aurkitu zuen anti-globalizazio mugimendua berpiztea.

20 kilometro eskasek bereizten dute hiri bat eta bestea, baina gutxitan egon da Heiligendam Rostocketik hurrunago. Distantzia honen testigantza bi hiriak bereizteko eraiki berri den 12 kmko hesiak ematen digu edota Rostocken bildutako milaka poliziek osatzen duten giza hesiak. Kaleak hutsik dira, dendak itxiak, tabernak ere… gerran ( exageratu gabe ) dagoen hiria topatzen da, poliziak ehunkako taldeetan patrullatzen dituen kale hauetan zehar ibiliz gero.
Eta guzti honek zer du ikusteko gurekin?

G8a munduko potentzia ekonomikoek osatzen dute. 5 izarretako hotel batean bildurik eta Risk-era jolasten baleude bezala – kubata eskuan eta purotzarra ahoan -, bertan erabakitzen da hurren lau urteetan nazioarteko politikagintzan zortziek egingo duten bidea. Inbasioak, enbargoak, terrorismoaren aurkako neurriak…. trukerako kartak dira munduko poterenetsuen eskuetan. Eta kartetan gure etorkizuna ageri da; Merkelen ondoan Sarkozy egongo baita exeria, eta beste hainbat karten artean gurea izango baitu esku artean. Europak bizi duen azken gatazka armatua, hots Euskal Herria.

Baina Euskal herriak badu gehiago G8ari esateko. Bertan pairatzen dugun errepresio maila ez baita gertakari isolatua. Gure zilborra begiratzeari uzten badiogu behintzat.

Duela bi hilabete izan zen hustua Conpenhagenen ungdomshus etxe okupatu historikoa, eta segurtasun indarrek terrorismoaren aurkako plana erabili zuten protestaldiei aurre egiteko. Grezian Bolognaren aurkako protestaldietan atxilotu hainbat dira oraindik kartzelan daudenak. Horien aurka ere terrorismoaren aurkako legeria erabili dute. Alemanian, duela hilabete 20 pertsona atxilotu zituzten. Beraien ekinbidea, G8a aurkako topaketak antolatzea, eta egozten zaien delitua berriz, terrorismoa.

Euskal gazteok eta bereziki Segiko kideak garenok argi ezagutzen dugu zer esan nahi duen mugimendu sozial eta politiko bat terroristatzat definitzeak….baina ez gara bakarrak. Berdina pairatzen dute danimarkar gazteek, eta alemanek, eta palestinoek, eta kurduek, eta Sardoek….guzti horiek egongo dira gurekin batera Heiligendameko hotelean jokatzen ari den partidan. Baina gure esku dago poteretsuenen eskuetan dauden kartetariko bat izatea, edota Rostocketik beraien ipur-masailean hazi berri den pikorra izatea.

Hamaika herri borroka bakarra, hamaika herri etsai berbera…Gu hemendik ibiliko gara euskal gazteriaren ohiuari entzungor egiten dioten horiei gure borrokarako grina mutur parean jartzen; eta munduko gainontzeko gazteekin batera ozen ohiukatzera. G8, entzun euskal gazteriak esateko duena: Amaitu jatzue txollue!!!

Gehiago…

ELKARRIZKETA txometarrei Irauli Uhinak irratsaioan [mp3 | ogg]

IRRATI ERREPORTAJEA 110 urte etxebizitza erosteko [mp3 | ogg ]

OSTIRALEKOA: 110 urte etxebizitza erosteko
Eskubidea negozio bihurtu zaigu, eta etxebizitza eskuratzea ezin zailago bihurtu da. Bitartean, 255.263 etxe hutsik ditugu gure auzo eta herrietan.

[+ Jarraitu irakurtzen]

Urte eta erdiz okupaturik dagoen Idiazabalgo Txomenane etxea desalojatzeko agindua iritsi zaie bertan bizi diren gazteei. Maiatzaren 24a baino lehen, etxea utzi behar dutela jakinarazi diete. Txometarrek desalojoaren aurka eta etxebizitza eskubidearen alde mobilizatzeko deia egin dute egun hauetarako.

Txomenane

Txometarren gutuna:

Etxetik bota nahi gaituzte TXOME S.O.S.

Bada urteterdi Idiazabalen gazte talde batek Txomenane etxea okupatu genuela. Etxebizitzaren egoera dagoen bezala geratzen zaigun aukera bakarra okupatzea da, eta guk hori egin genuen. Denbora guzti honetan zehar gauza pilo bat egin ditugu etxe honetan. Hasita, etxeko konponketak, baratzeko lanak, kontzertuak, bazkari, afari, kantautore, ensaio, berriketa, barre, negar? Urteterdi honetan eman digu aukera makina bat gauza egiteko. Hasieratik bizitoki izan da eta gainera aktibitate ezberdinen bitartez beti saiatu izan da jendeagana zabaltzen.

Hemen bizitakoa ta landutakoa ez digu iada inork kenduko baino min ematen du 50 urtetan erabat hutsita egon den etxe bat eta okupatu eta jabeak denuntzia jartzea. Hau da bizi den errealidadea, herrietan etxe huts piloa eta okupatu ezkero desalojoak!!!! Zergatik?? Ez dutelako nahi gazteak geure erara antolatzea eta beraiek markatutako lineatik atera ezkero daukaten alternatiba bakarra zigorra delako. Ez al duzue ulertzen guk gure erara bizi nahi dugula?. Zergatik behartu nahi gaituzte beraiek markatutako bidea jarraitzea? Hipotekan leporaino sartu eta beste gauza guztietaz ahaztu, egunero lantokira joatea behaztuz?. Hori da gaur egungo jendearen joera?. Beste batzuek diote okupatzea ez dela erreala eta utopia dela? Ba nik uste nahikoa adibide garbi ditugula gure inguruan okupazioa erreala dela esateko eta hainbeste sinbolismo alde batera utz ditzagun eta jarri dezagun praktikan posible da eta.

Gu oraindik Txomen gaude bizitzen baino badirudi hemendik gutxira kalean utziko gaituztela! Bai betiko 2 hankako txakurrak etorriko zaizkigu beraien porra ta peloteroekin gu kalera botatzera. Hau da beraien legea ta horrela omen dira gauzak, baino guk uste dugu gauzak beste modu batera egin litezkela.

Hemendik abisua pasatzen den datorren asteetan edozein egunetan gerta litekeen desalojoari erantzuteko ta desalojo egunean Idiazabal herrian etxebizitzan aldeko erantzun potente bat emateko.

Etxebizitza denon eskubidea da Borroka dezagun

Txome bizirik!!!!!!!!!!!!!!!!!!!!!!!!!!

Txometik ez die pasako!!!!!!!