Arrosa, Euskal Herriko Irrati-sarea » Hala Bedi Irratia

Hala Bedi irrati eta Gasteizko gaztetxearen urtebetetze jaia

Hala Bedi Irratia — Wed, 24 Sep 2008 07:56:21 +0000

Urriaren 11an Gaztetxearen 20. urtemuga eta Hala Bediren 25. urtemuga ospatzeko egun osoko jai eguna antolatu da. Goizetik gaberarte hainbat ikuskizun, emanaldi, kontzertu, dantza, pelota partidu, jolas, tailer, ibilbide historiko eta bazkari herrikoia izango dira besteak beste.

Irratigintzari dagokionez, USB_FMirrati antenak deituriko ikastaro interesgarria izango da goizeko 11etatik aurrera. Nahi duenak parte hartu dezake, gonbidapena egina dago.

Informazio gehiago Txorionak-en web orrian.

Hala Bedi irratiak bazkide kanpaina martxan jarri du

Hala Bedi Irratia — Thu, 24 Apr 2008 09:30:08 +0000

Hala Bedi irratiak bazkide kanpaina martxan jarri du bere 25. urtemugan, ekonomikoki independiente izaten jarraitzeko. Prentsaurrekoa Hala Bedi Tabernan izan da, independentzia ekonomikoa bermatzen duen beste diru iturri baten eremua.

Hala Bediko bazkideak (Halabelarriak) dira irratia ekonomikoki mantentzen dutenak, Halabelarriak irratiko diru sarreren %60 baino gehiago suposatzen dute. Gaur egun 600 bazkide inguru ditu Hala Bedik. Irratiaren ekonomia berrindartzeko asmoz dator Egin zazu egin zaitez Halabelarri kanpaina. Oraingo honetan Halabelarri “beteranoari” eskatuko zaio bazkide berria egin dezan; hau da, Halabelarri bakoitzari gutxienez bazkide bat egitea eskatzen zaio. Halabelarri berriak egiteko postalak egongo dira zenbait tabernetan eta AEK eta IKAko euskaltegietan. Postalak uzteko ere buzoiak egongo dira irratian, tabernetan eta euskaltegietan.

Halabelarrien lana eskertzeko, egiten den bazkide bakoitzeko bi pertsonentzako afaria lortuko du bazkide “zaharrak”. Kanpainari buruzko informazio guztia Hala Bediko web orrian duzue, bazkide atalean.

Hala Bediko Jardunaldien bideoa

Hala Bedi Irratia — Wed, 05 Mar 2008 18:03:40 +0000

Hemen daukazue ikusgai otsailaren 29an eta martxoaren 1ean Gasteizko Aldabe Gizarte Etxean eginiko jardunaldien bideoa.

Click here to view the embedded video.

Zine Melita kazetari kurdu alemaniarra Hala Bediko jardunaldietan

Hala Bedi Irratia — Fri, 29 Feb 2008 10:46:03 +0000

Asteburu honetan izan behar diren Hala Bediko jardunaldien barruan, gaur Zine Melita kazetaria izango dugu. Zine Melitak alemanian publikatzen den Yeni Ozgedikour Politika egunkariko kazetaria da, egunkari honek duela hiru urte Alemaniako poliziak itxitako Ozgur Politika ordezkatzen du. Europako egunkari kurdu bakarra da.

Ozgur Politika egunkaria 1994an sortu zen. Alemanian komunitate kurdu oso handia dago, milioi bat ingurukoa. Pertsona horiei zuzenduriko egunkaria zen, Kurdistaneko berriak kurdoz eskainiz. Alemaniako estatuak Turkiako estatuaren presioei men eginez 2005an itxi egin zuen PKKren kontrolpean zegoela argudiatuz.

Gaur arratsaldeko 6,30etatik aurrera Gasteizko Aldabe gizarte etxean izango da bere hitzaldia.

Txorionak! Aurten la liamos pajarraka!

Komunikazio alternatiboaren jardunaldiak Hala Bedin

Hala Bedi Irratia — Fri, 22 Feb 2008 11:13:52 +0000

Hala Bedik 25 urte ospatzen ditu aurten eta hainbat gauza antolatzen ari gara, besteak beste jardunaldi hauek. Hala Bedi irratiak otsailaren 29 eta martxoaren 1ean komunikazio alternatiboaren inguruko jardunaldiak antolatu ditugu Gasteizen.

Jardunaldietan batez ere komunikabide alternatiboen bilakaera eta eragin soziala aztertu nahi da. Aldi berean irrati uhinen frekuentzien inguruko legedi berriaren inguruan informazioa jasotzea nahiko genuke, gauzak apur bat argitzeko. Horretarako gai hauek gertutik ezagutzen dituzten pertsonak gonbidatu dira.

Bestetik teknologia berrietan ere apur bat sakontzeko aukera izango dugu irratigintzan eta web orrietan dabiltzan kideekin.

Azkenik aipatzea ere gonbidatu berezi gisa Zine Melita izango dugula, Alemanian kurdoen egunkari baten lan egiten duen kidea. Europako egunkari kurdo bakar hau duela 11 urte estatu alemaniarrak itxi egin zuen eta nahiz eta gaur egun berriro martxan egon, errepresio gogorra jasaten dute.

Bereziki Euskal Herrian irratigintzan edo komunikabide ezberdinetan dabiltzan guztiak gonbidaturik daude.

TXORIONAK! Aurten la liamos pajarraka!

Egunkariaren itxieraren inguruan Txema Auzmendiri elkarrizketa

Hala Bedi Irratia — Wed, 20 Feb 2008 07:56:30 +0000

Bost urte pasa dira Egunkaria itxi zutenetik eta itxiera eta ondorengo bost urteetan prozesuak izan duen bilakaeraz Txema Auzmendi auziperaturekin hitz egin dugu. Txema Auzmendi Egunkaria SA-ko administrazio kontseiluko idazkaria zen eta gaur egun bere aurka 14 urteko espetxe zigor eskaera dago.

Gaur egun AVT eta Dignidad y Justicia elkarteek, herri akusazio gisa agertute, Guardia Zibilaren txostenetako argudio guztiak bere egin, eta espetxe zigor gogorrak eskatu dituzte Egunkaria auziko hamabi auzipetuentzat: guztira 300 urtetik gorako kartzela zigorrak eta 234.000.000 € inguruko isunak.

ENTZUN:

Osteguneko greba dela eta jarraipen berezia egingo da Hala Bedi irratian

Hala Bedi Irratia — Wed, 13 Feb 2008 14:38:49 +0000

Osteguneko grebaren jarraipen berezia egingo da Hala Bedi irratiko goizeko Suelta La Olla magazinean eta arratsaldeko Zebrabidea euskarazko magazinean. Korrespontsalen bidez kaleko mobilizazioei buruzko zuzeneko informazioa emango da. Edozein informazio emateko irratiko erredakzioaren telefonoa hau da: 945 12 88 55 .

Araban, grebaren berri edukitzeko Hala Bedi sintonizatu.

Txorimaloek Gasteiz hartu zuten

Hala Bedi Irratia — Tue, 05 Feb 2008 06:53:34 +0000

Asteburu honetan Gasteizen bizitakoa ikaragarria izan zen, Hala bedi Irratiak eta Gasteizko Gaztetxeak 25 eta 20 urte eta gero bizi bizirik daudela erakutsi baitzuten. Larunbatean 250 txorimalo desfilatu zuten, igandean 50 txorimalo, azken hauek dena txapeldunen moduan dena emanez.

Ihauteriak eta gero nekatuta baina ikusitakoarekin gerora begira ilusioz topera horrela dabiltza gure txorimaloek. hemen daukazue ikusgai bideoa:

Click here to view the embedded video.

Txorimaloak kalera aterako dira asteburu honetan

Hala Bedi Irratia — Thu, 31 Jan 2008 08:31:10 +0000

Asteburu honetan ihauteriak dira eta Gasteizen Hala Bedi irratia eta Gaztetxea karroza bateratuarekin irtengo dira. Txorimaloz jantzirik pizti hegodunak uxatuko dituzte, autogestioa eta asanblada arma gisa harturik. 20 eta 25 urte betetzen dituzte Gaztetxeak eta Hala Bedik, eta hori ospatzeko urtean zehar hainbat gauza egingo dituzte urte osoan zehar. Besteak beste iñauteritan karroza bateratua antolatu dute.

Adi egon! Oraindik badago karrozan parte hartzeko aukera! Txorimaloz karrozara joateko asmoa dutenentzat honako kedadak daude:

Ostirala: Koreografiaren azken ikutuak, azkenengo mozorroak hartzeko… 2 kedada daude deituak, bata arratsaldeko 18:00retan eta bestea 20:30eta(kontzentrazio ostean).

Larunbata: 17:00tetan Gaztetxean, karroza baino lehen gauzak hartzeko.

Igandea: 11:30etan Iparralde Gizarte Etxean bertan.

Iñauteri gabean Gaztetxean eta Hala Bedi tabernan DJ-ak egongo dira giroa berotzeko. Informazio gehiago www.txorionak.org web orrian.

TXORIONAK! 20 urte okupatzen, 25 urte komunikatzen

Hala Bedi Irratia — Thu, 24 Jan 2008 09:01:37 +0000

Ostegun honetan Hala Bedi eta Gaztetxeko kideek prentsaurrekoa eman dute aurtengo urtean biek batera urtemuga ospatu behar bait dute. Hona hemen Gazteizko txorimaloaren istorioa:

Hor izan dira beti, txikitatik kuriositatez begiratu izan ditugun panpina berezi horiek. Botoiz egindako begi parea, lastoz betetako sabela, nonbait aurkitutako kapela buruan dutela. Ideia sarez jantziak, ortuetako babesle baldintza gabeak izan dira beti gure txorimaloak. Pasako da negua, elurte izugarriak, haize bolada ikaragarriak eta hor jarraituko dute, zutik. Pasako da uda, lehorteak, euri zaparradak. Pasako da udazkena, eroriko dira hostoak eta txorimaloek tente jarraituko dute beren lekuan, udaberrirako gero eta gutxiago falta dela jakinda.

Egia da. Hala Bedi Arabako irrati libreak eta Gasteizko gaztetxeak asko dute txorimalotik. Lehena 1983ko abuztuaren 4 batez sortu zen hiri honetan bertan eta 25 urte beteko ditu aurten, komunikatzeko modu ezberdin baten alde lanean. Bigarrena 1988ko San Prudentzio bezperan emandako ostiko batez jaio zen eta aurten beteko ditu bere 20 urteak, amets ezberdinen topaleku izan den gazteen etxeak. Biak ala biak proiektu askeak dira. Bide desberdinak egin badituzte ere, oinarri berdinetan sustraitzen diren alternatibak dira gasteiztarrontzat eta 2008an harrotasunez aldarrikatu nahi genituzke gure hirian hain beharrezko ditugun bi errealitate hauek.

Asanblada bidez egin dute aurrera biek. Eredu autoritario eta hierarkiakoetatik ihes eginez eta guztion parte-hartzea bermatuz. Urte luze hauetan burutu diren ekimen anitzek eta egunez egun egiten den lanak agerian uzten du asanbladaren eraginkortasuna. Irudimenari eta ilusioari eskerrak, berauetatik pasatako belaunaldi ezberdinek beraien arrastoa utzi dute hiri honetan. Eta hori asanbladarekin batera, Autogestioari esker izan da. Autogestioa da bi proiektuen bereizgarri nagusia. Instituzioen diru laguntzen menpe egon beharrean, guk geuk sortu ditugu geure beharrak asetzeko tresnak, inork baldintzatu gabe. Halere, autogestioa modu zabalagoan ulertzen dugu . Lan egiteko modu bat da guretzat. Profesionaletara jo beharrean ondoan daukanarengandik ikasiz, akatsetatik hobetuz, proiektu bakoitza autogestiorako bidean pauso txiki bezala ulertuz.

Txorimaloak gara beraz, generazio berri bakoitzarekin biziberritzen diren txorimaloak. Hasierako izpiritu berbera mantentzen duten txorimaloak. Batzuek beldurra izan digute hasieratik. Berezia edo desberdina dena baliorik ez duen zerbaitekin parekatu nahi izan dute, aurreiritziak landatuz eta epai faltsuak eginez. Urteen poderioz ordea, txori bihurri anitz gerturatu da guregana. Hain beldurgarriak ziren panpina haiek inor gutxi beldurtzen zuten beraiengana hurbildutakoan. Kuriositatez beteta hasieran, mesfidantzaz zenbaitetan. Baina denborarekin, gero eta gehiago izan dira gure ondora jolastera etorri diren txoriak. Txori hauek denak, Gasteizko herri mugimendu osoa bezain anitzak izan dira, kolore eta ideia desberdinetakoak.
Hala Bedi irratia eta Gasteizko Gaztetxea herri mugimenduaren bozgorailu eta tresnatzat ulertzen ditugu ezinbestean. Herri mugimenduari esker diraugu bizirik. Txori horiek guztiek eman diote zentzua gure eguneroko lanari, beharrezkoa izan denean euren berotasun osoa eskainiz.