Arrosa, Euskal Herriko Irrati-sarea » Info7

Bizkaiko txapeldun ordearen dolua

Info7 — Tue, 23 Dec 2008 15:06:38 +0000

Bostetako Diligentzian izango da bihar Unai Iturriaga. Bizkaiko bertsolaren gailurretik horren gertu geratzeak utzi dion sentipenez galdetuko diogu; eta ezker eskubi egurra banatuko ikazkinaren etorreraren egunean.

Egunero, Bostetako Diligentzia. Bostetan noski!

Igor Portu lesakarraren tortura testigantzaren grabazioa

Info7 — Fri, 22 Feb 2008 12:03:10 +0000

Infozazpi irratiak Igor Portu lesakarrak, Donostiako ospitalean ingresaturik zegoela, haren tortura salaketa ikertzen ari den epaileari egindako aitortza eskuratu du. Bertan, atxiloketa nolakoa izan zen eta ospitaleratu arte zer gertatu zen kontatzen du xehetasunez. Gaur, gazte lesakarraren atxiloketan parte hartu zuten 8 guardia zibil ari dira inputatu gisa deklaratzen Donostiako epaile beraren aitzinean.

Porturen lekukotza

Donostiako Revolutionary Brothers bikotea ezagutzeko parada ezin hobea

Info7 — Fri, 18 Jan 2008 09:27:10 +0000

Aritz Usandizagak Infozazpiko Sound System musika saioan Revolutionary Brothers Sound System taldeko Unai eta Iker anaiak elkarrizketatu ditu. Rev. Brothers Donostiako sound systema da eta Euskal Herrian jamaikar musika zabaltzeko helburua dute. Reggae musikaren zaletu amorratuak dira eta festak antolatzen dituzte nonahi. Saioan Euskal Herrian reggae musikaren egoeraz, antolatzen dituzten jaiez eta orohar, jamaikar musikaz aritu dira solasean.

Entzun ezazu!

Alberto Iglesias konposatzaile Donostiarrak Afghanistanen girotutako “The Kite Runner” filmarako egindako soinu banda entzungo dugu Hegoaldeko Ostatuan

Info7 — Mon, 07 Jan 2008 15:57:44 +0000

Hegoaldeko Ostatuaren 77garren atala disko berriz josita dator. Alde batetik Bob Brozman gitarra jole umoretsuaren azken lana – “lumiere” – aipatuko dugu eta haren slide gitarrarekin gozatuko dugu. Horretaz gain Mercan Dede turkiar musikari ezagunaren “800” azken lana ere entzungo dugu. Azken honetan musikari sufiak beste eragin batzuk erakutsiko ditu, halanola fanfare musika.

Gainera Alberto Iglesias konposatzaile Donostiarrak Afghanistanen girotutako “The Kite Runner” filmarako egindako soinu banda entzungo dugu; Maria De Medeiros zinema aktore eta zuzendariaren alde musikala deskubriarazi digun “A Litle More Blues” ere ezagutuko dugu. Besteak beste Bobby Mattos perkusio jole “maisuaren” pieza eder bat entzungo dugu eta beste hainbat kontu aipatuko ditugu 2008ko lehen saioan zehar. On egin.

Zain izango gaituzu!

Astelehen gauetan, Infozazpi irratian, edonoiz info7.com-en

Balin klima aldaketari buruzko goibilerak akordioa utzi du… zerbaitetarako?

Info7 — Mon, 17 Dec 2007 12:18:14 +0000

Asteburu honetan bukatu da NBEk Balin antolatutako klima aldaketaren aurkako gailurra, Kyotoko protokoloa berritu asmo duena. Azken unean, gailurra porrotean amaituko zela zirudienean, akordio berri bat hitzartu dute han bildutako estatuek.

Ezkor agertu da, ordea, Iñaki Barcena Ekologistak Martxan taldeko kidea Infozazpiko Kale Gorrian magazinean. Bere aburuz, klima aldaketaren aurka borrokatzeko herrialde aberatsenen hazkunde eredua jarri behar da auzian; eta hori oso zaila da egiten…

Entzun audioa

Podkaraz, euskarazko podcast erakustaldiko emaitza

Info7 — Tue, 11 Dec 2007 08:37:46 +0000

Infozazpi irratiak, UEUrekin eta EHUko irrati tailerrarekin lankidetzan, Podkaraz euskarazko podcasten erakustaldia antolatu zuen joan den udaberrian. Epaimahaiak eman du haren iritzia.

1. MacMikel: Western bat. Txoroa. John Fordi eta Quentin Tarantinori omenaldi txiki bat.

2. Ostatuko mamua: Joseba Sarrionandiak ‘Ni ez naiz hemengoa’ liburuan idatzitako ipuinaren soinu moldaketa.

3. Amuma: “Nire amumak bere bizitza laburbildu zuen, eta azalerako ukendua zelan egiten duen kontatu, Bermioko euskalkia erabiliz. Ulertzeko zaila agian, baina, narratzaile ederra nire amuma, 82 urte oso minutu gutxian kontatzeko kapaza.”

4. Hoz(s)kailua: Hozkailua hoskailu bihur daiteke. Betaurrekoak galdu dituzula? Inoiz imajinatu ez duzun lekuan baietz aurkitu. Izan ere, imajinazioak eroan zaitzake inoiz aurkitu gabekoa ikustera… begiak itxita.

5. Ultrakomunikatzen: Konputagailu birusak.

Aste honetatik aurrera, eta bi astez, Infozazpi irratian emitituko ditugu podcast hauek. Entzun eta gozatu!

Gaur, Katuk Morun saioan…

Info7 — Wed, 05 Dec 2007 08:33:58 +0000

Sintonia estreinatuko du gaur Infozazpi irratiko Katuk Morun musika saioak. Adi, norena den asmatzen dutenen artean disko bat zozketatuko baitugu datozen asteetan. Hurrengo saioan izango duzue datu gehiago. Gaurko saioan, besteak beste, Bill Callahan, Surfin Kaos, RED, Bettye LaVette, Joseba Irazoki, Nick Cave & Bad Seeds, The Felice Brothers, Edwyn Collins, Black Lips eta Devendra Banhart entzungo ditugu.

Infozazpi irratia

Infozazpik webgune berritua du gaurdanik

Info7 — Wed, 05 Dec 2007 08:33:35 +0000

Entzuleekin elkarrekintza handiagoa eta podcast eskaintza zabala ditu blog itxura hartuko duen gune berrituak

Abenduarekin batera jantzi berria estreinatuko du Infozazpi irratiak. Gune osatuago eta biziagoa eskaintzeko asmoz egin da aldaketa, diseinu modernoagoa eta iristerrazagoa izateaz bat.

Izan ere, orain artekoa gunea motz samar geratu da irratiak azken urtebetean izan duen garapen garrantzitsuari erantzuteko, besteak beste, programazio eskaintza asko hazi baita. Egun, astelehenetik ostiralera bederatzi orduko emankizuna eskaintzen du nazio mailako irratiak albistegi, kronika, magazine eta musika saioen artean. Larunbatetan eta igandetan, berriz, lau orduko eskaintza langara iristear da.

Irratiaren programazio zabalkunde horri erantzuteaz bat, entzuleen eta irratiko esatari nahiz kolaboratzaileen arteko harreman zubi berriak eraiki nahi izan dituzte aldaketarekin. Aurrerantzean, irratiko saio bakoitzak bere atal propioa izango du eta bertan saioen edukiak, aurrerapenak eta albisteak jarriko dira entzuleen eskura. Gainera, iruzkinen bidez, entzulearen eta esatarien nahiz kolaboratzaileen arteko harremanak estutzeko aukera ere emango du blogak, entzuleak webgunean bere deialdi, iritzi eta ekarpenak zabaltzeko aukera izango baitu.

Bestetik, diseinu berriarekin nabarmen ugarituko da podcast eskaintza. Podcast sistemaren bidez irratiko albistegi, analisi tarte, kronika, musika saio, zientzia saio edo dena delako audio fitxategia modu errazean ordenagailura edo eskuzko mp3 irakurgailuetara jaisteko aukera izango du entzuleak. Sistema horrek, gainera, gustukoen dituen saio, analista edo kolaboratzailearen programa eguneratu bezain laster jakinarazten dizkio entzuleari, etengabe webgunera sartu eta zer berrikuntza izan den begiratzen ibili beharrean.

Azkenik, irratia saretik entzuteko era ere erraztu nahi izan dute. Gaurdanik aurrera, Infozazpi zuzenean entzuteko nahikoa izango da webguneko goi-eskubi aldeko Play ikurra zapaltzea.

Burdinola: metal musikaz guztia jakin nahi, eta euskaraz?

Info7 — Thu, 20 Sep 2007 12:02:59 +0000

Infozazpiko gaueko musika ortzadarrak kolore bat gehiago izango du denboraldi berrian, musika estilo bakoitzeko berrikuntzak eta albisteak ezagutzeko parada ematen duen programa-eskaintza are zabalagoa izango baita irailaren 20tik aurrera. Hastera goazen denboraldi berriko izarra Burdinola saioa da, metal doinuen nobedadeak jorratuko dituen saioa. Gure artean horren ugari diren metal jarraitzaileek pozik hartuko dute berria, ezbairik gabe.

Burdinola zaildutako egitasmoa da. 2001. urtean eskaini zuen lehendabiziko saioa. Aukera, Donostiako Ttan Ttakun irrati aske eta euskaldunak (106.8 FM) eman zion, eta aurrerantzean ere saioaren etxe izaten jarraituko du.

Baina uhinetan 6 urte betetzear dagoenean Burdinolak urrats berri bat emango du. Donostia eta inguruetatik Euskal Herri osora zabaldu nahi du bere proposamena, eta haratago, mundu osora. Honela, irailaren 20tik aurrera Burdinola saioa Info7 irratian ere entzun ahal izango da egitura aldaketa nabarmen batekin eta beti bezala metal musikaren alde eginez. Izan ere, musika estilo honek oraindik ere baditu jarraitzaile dezente baina leku gutxi du medioetan. Honekin batera, heavy metala euskaraz ere disfruta daitekeela erakutsi nahi du Burdinola irratsaioak. Zita ostegunero izango da gaueko 11etatik aurrera.

Burdinola irratsaioaren datuak motzean…
Esataria: Inaxio Esnaola.
Iraupena: Ordu eta erdikoa.
Irratsaio mota: Musikala.
Edukia: Nazioarteko zein Euskal Herriko rock gogor eta heavy metal musika beren barne estilo guztiak kontutan hartuta.

Irratsaioaren atalak
> NOBEDADEAK
Hilabeteko diskoa.
Azpimarratzeko berrikuntza (astekoa).
Nobedade solteak.

> HERRIKO BURDINA
Euskal Herriko metal musikaren atala: nobedadeak eta atzera begirakoak.
Elkarrizketak (noizean behin).

> KONTZERTU AGENDA
Astean zehar izango diren metal kontzertu interesgarrienen bilduma.
Atzerriko talde baten bisita aprobetxatuz, abesti bat.

> METALDAKETA
Metal musikatik kanpo dauden abesti ezagunei egindako metal bertsioen tartea.

> AZKEN MAILU KOLPEA!
- Aspaldiko abestiak edota zeresana eman dutenak azken urteetan.

Ostegunero, gaurtik hasita, 23:00etan, Infozazpi irratian

Jarraitu Ertz jaialdia zuzenean Infozazpi irratiaren bidez

Info7 — Mon, 10 Sep 2007 13:52:15 +0000

Adierazpide esperimentalean ari diren nazioarteko artistak bilduko ditu aurten ere zortzigarrengoz Nazioarteko Bertze Musiken jaialdiak. Asteburuko ekitaldiak erretransmitituko ditu Infozazpik

Badator berriro ere ERTZ bertze musiken jaialdia eta Infozazpi irratiak ez du hutsik egin nahi izan musika esperimentalean aitzindari den hitzordu honetara. Dagoeneko hamarreko muga psikologikotik hurbil, antolatzaileek ez dute
ukatzen abentura honi ekin ziotenetik ikuspegia aldatu zaiela, denborak eta esperientziak bide berriak eman dizkiolako jaialdian parte hartze zuzena izan duten bizitzari. Horixe da “jaialdi honek, eta urtean zehar egiten ditugun ekitaldiek, erakustera eman diguten gauzarik ederrena”, aitortzen dute.

VIII. edizio honetan, horren gustukoa duen “bertzetasun” horrek (ez nahasi, arren, desberdintasunarekin) bide berriak irekitzen jarraitzera bultzatu ditu antolatzaileak, eta hori argi islatzen da aurtengo prestatu duten egitarauan. Esaterako, zinemak presentzia berezia izanen du ERTZen, nagusiki aurten jaialdiaren historian lehen aldiz komisario gonbidatu gisara lankide izan duten ALEX MENDIZABALen eskutik etorriko diren MARCO IEIE eta BRUCE McCLUREn partehartzearekin. Urtero moduan aurten ere espazio berriak bilatu nahi izan dituzte jaialdirako eta orain arte erabili ditugun espazioen zerrenda luzera Berako udal igerilekua, frontoia eta Donostiako Koldo Mitxelena kulturunea gehituko dira.

Gainerakoan, horren gustuko dituzten entsaladak proposatuko dituzte, ORTHODOX taldearen metal doinuetatik, ORBES taldearen kristalezko musikara, tartean POLE POLEren kabaret mediterranearra, MARCELLO LIBERATOren ttantta sinfonia, edo KNELL eta EDORTA IZARZUGAZAren gitarra esperimentuak gehituz. Horrez gain, urtero bezala lantegi-tailerrak antolatu ditu ERTZek, Beran eta Donostiako ARTELEKUn ospatuko direnak, eta batek daki zenbat ezusteko gehiago topatuko ditugun bidean.

Infozazpiren konkexioak:

Larunbata, irailak 15, 20:00etatik aurrera Beratik, ERTZ jaialdiaren zuzeneko emankizuna, Oier Iruretagoienaren eskutik.

Astelehena, irailak 17, 23:00etatik aurrera, POLE POLE kabaretak igandean eskainitako kontzertuaren emanaldia.

ERTZ 2007 EGITARAUA :

IRAILAREN 15a LARUNBATA BERAKO KULTUR ETXEAN
Bera (Nafarroa)
18:00 Disko azoka:
GATZA: PIDGIN
ARTO ARTIAN
AMANITA RECORDS

19:00 Instalazioak:
MARCELLO LIBERATO
NERUGNARA ESOJ NAUJ

20:00etan Infozazpitik zuzenean kontzertuak:
ALEX MENDIZABAL
EDORTA IZARZUGAZA & KNELL
MARCELLO LIBERATO & MARCO IEIE
BRUCE McCLURE
ORBES
ORTHODOX

IRAILAREN 16a IGANDEA
UDAL IGERILEKUAN
Bera (Nafarroa)
17:00 Kontzertuak:
ALEX MENDIZABAL, MARCO IEIE & MAR-
CELLO LIBERATO
(urazpiko kontzertua / concierto subacuático)
POLE POLE
(astelehenean osorik Infozazpin)

IRAILAREN 16a IGANDEA
TOKI ONA Parkea
Bera (Nafarroa)
Arratsaldean zehar, Instalazioa:
S.P.U.L.K.P.Z.
Soinu paisaiak urazpian, labirintuan eta kartzelan
Lorenzo Lustri, Robin Martin, Luca Miti, Alex
Mendizabal, Nagore Garcia, Oier Etxeberria, Oier
Iruretagoiena…

IRAILAREN 17a ASTELEHENA
ARTELEKU
Donostia- (Gipuzkoa)
20:00etan Kontzertua :
POLE POLE

IRAILAREN 20a ASTEAZKENA
KOLDO MITXELENA KULTURUNEA
Donostia (Gipuzkoa)
20:00etan Kontzertua-zinema :
BRUCE McCLURE