Arrosa, Euskal Herriko Irrati-sarea » Tastas Irratia

Tas-Tas Irratiak web orri berria estreinatu du

Tastas Irratia — Wed, 16 Feb 2011 10:22:50 +0000

Astelehen honetan, otsailak 14, Tas-Tas Bilboko irrati libreak web orri berria estreinatu du bere betiko helbidean. Bertan, nobedade moduan, zenbait irratsaioren blogak topatu ahal dira: Kaleko Bentanie euskarazko magazina, Mar de Fueguitos eguerdian emitizen den saioa, Axa Mixa umeentzako irratsaioa, Mikamada hazkuntza naturalari buruzko saioa …) Bere presentzia sare sozialetan ere islatzen da web orri berrian. Honetaz gain, zuzeneko emisioa entzun daiteke eta irratiko saio eta audio esanguratsuenak ere entzun eta jaitsi ahal dira. Hemendik aurrera, nahi duenak web orriaren bitartez irratiko bazkide egiteko aukera izango du, laster 20 urte beteko duen irrati libre hau ekonomikoki sostengatzeko.

Mar de Fueguitos eta Tas-Tas Irratiko urteurrenetako kontzertu-jaia

Tastas Irratia — Tue, 25 May 2010 13:20:52 +0000

Mar de Fueguitos irratsaioak 10 urte betetzen ditu. Ospatzeko Bilbon, Kafe
Antzokian, ekainaren 19an gaueko bederatzi t’erdietan, kontzertu-jaia
antolatu du. Zenbait sorpresa egoteaz gain, jaian Iruñeako Gualitxo eta
Zaragozako Mallacan taldeek joko dute. Sarrerak 10 euro balio du eta
bilduko den dirua Tas-Tas Irratirako izango da. Gainera, aurten Tas-Tas
Irratiak 18 urte bete ditu; bi ospakizun ekitaldi batean beraz. Sarrerak
salgai egongo dira Kafe Antzokian, Tas-Tas Irratian eta Kafe Antzokiko web orrian.

Mar de Fueguitos irratsaioko 10. urteurreneko kontzertu-jaia
Ekainak 19 zapatua, 21:30etan, Kafe Antzokia, Bilbo
Gualitxo (Iruñea) eta Mallacán (Zaragoza)
Sarrera: 10 euro.

Irailaren 14an, Kaleko Bentanieko denboraldi berria

Tastas Irratia — Tue, 08 Sep 2009 16:14:49 +0000

Irailaren 14an Kaleko Bentanie Tas-Tas Irratiko euskarazko magazina Bilboko irrati libre honen uhinetara itzuliko da. Bere 5. urtean magazin honek hasieratik izandako osagaiekin jarraituko du: aktualitatearen errepasoa, gizarte eragileei ahotsa eman eta gai ezberdinen inguruko atalak. Adibidez, 35mm atalean zinemaren ikuspuntu ezberdina plazaratzen dute magazin honetan, Jaxone Usandizaga irratiko kolaboratzailearen eskutik. Hitzen Bentanie literatura kritikoaren esparrua dugu, Marta Luxan-ek jorratua. Ikustezinak atalean garaileen Historiak desagertarazitako herriak, istorioak edo pertsonaiak azaltzen dituzte, Roberto Moreno irratiko kidearen eskutik.

Guzti honetaz gain, aurten Interneten dauden beste proiektu komunikatiboei magazinaren baitan lekua egitea erabaki dute. Eta astero, CubaInformacion , HerriKolore eta Apurtu proiektuei eskainitako atalak entzuteko aukera egongo da. Eta sexualitateari buruzko atal berria ere edukiko dute. Iaz bezala Kaleko Bentanie astelehenetik ostiralera 17etatik 18ak arte entzungai egongo da, Tas-Tas Irratiko uhinetan (FMko 97an)

Tas-Tas Irratiak “Dzanga egin uhinetan!” kanpaina abiatu du

Tastas Irratia — Mon, 22 Jun 2009 09:21:32 +0000

Tas-Tas uneoro garatzen ari den irrati libre eta komunitarioa dugu. Gero eta norbanako eta eragile gehiago Tas-Tasen entzun eta parte hartzeko aukera egiten dutela uste dugu,irrati espektroan freskotasuna eta kolore aniztasunaren ekarpena egiten dugulako, irrati ofizialen pentsamendu bakarra eta zaharkituaren aurrean, boterearekiko gero eta menpekotasun gehiago daukaten irratiek alegia.

Gaur egun Tas-Tas Irratiaren baitan 90 lagunek parte hartzen dute era boluntarioan proiektu honek aurrera egin dezan eta ahalik eta jende gehien hel dadin, gizarte aldaketa eta herri mugimenduaren aldarrikapenak sustatuz. 90 lagun hauetaz gain, gaur egun laguntzaileak direnak eta Zaratas konpartsan parte hartzen dutenek kontutan hartu beharra dago.

Baina bere atzean alderdi politikoek eta talde mediatiko handiek ez dituen edozein proiektu bezala, jendearen bultzada behar dugu aurrera egiteko. Uste dugu hobetzen ari garela bai emisio kalidadearen aldetik baita eskaintzen ditugun edukietan ere, eta aurrera jarraitzeko zure laguntza ekonomikoa behar dugu jende gehiagorengana iristeko eta benetako irrati herrikoia lortzeko.

Orain, Tas-Tas Irratitik “Dzanga egin uhinetan!” kanpaina abian jartzen dugu. Kanpaina honek bi helburu nagusi ditu. Alde batetik, gaur egun dauzkagun laguntzaileen kopurua areagotzea (150) proiektuaren egonkortasuna eta independentzia ekonomikoa bermatu ahal izateko; bestaldetik, kalean eta beste aldizkarietan gure proiektua ikusgai bilakatu nahi dugu, proiektua gure jendearen artean iragartzeko.

Uste dugu berezko proiektuak sustatu behar ditugula, hedabide handiek gobernatzaileengan eta bere politikengan ematen duten sostengu lotsagarriaz kexatzeari uzteko. Holan bideratu ahal izango dugu hainbeste desiatzen dugun gizarte aldaketa. Hedabide ezberdin baten aldeko apustua egin, dzanga egin uhinetan! Aurreko guztiagatik eskatzen dizugu, irrati honen lana beharrezko eta positibotzat jo izanez gero, proiektua finantzatzen laguntzeko, Tas-Taseko laguntzaile eginez. Egin dezakezu laguntzaileak (ARROBA)tas-tas.org helbidera email bat idatziz edo 94 4 15 14 14 telefonora deituz.

Bihotz Bakartien Kluba, Kaleko Bentanien

Tastas Irratia — Wed, 29 Oct 2008 17:13:41 +0000

Bihotz Bakartien Klubak poemak kantak bihurtu ditu azken urteotan. Larunbat honetan, Durangoko Plateruena Kafe Antzokian, proiektu honetan ibili direnek bere azken kontzertua emango dute. Bertan gonbidatu bereziak egongo omen dira. Kaleko Bentanien (Tas-Tas Irratian, astelehenetik ostiralera, arratsaldeko 17etatik 18ak arte) proiektu honen partaidea den Gotzon Barandiaranekin hitz egingo dute.

Animatu Tas-Tasen parte hartzera!

Tastas Irratia — Tue, 14 Oct 2008 17:18:08 +0000

Tas-Tas Irrati Libreak beste denboraldi bati hasiera eman dio. Uhinetan ea 17 urte emititzen egon gara. Azken boladan, euskararen presentzia areagotu egin da: astelehenetik ostiralera, Kaleko Bentanie euskarazko magazina badaukagu, baita Arrosa Irrati Sareatik jasotako irratsaio mordoxka ere. Aurten, euskararen presentzia hori handitu nahiko genuke. Beraz, proposamenaren bat baldin badaukazue irratian parte hartzeko eta euskaraz irratsaioren bat egiteko, animatu eta idatzi gure helbidera edo deitu 94 4 15 14 14 telefonora.

Kaleko Bentanieko denboraldi berria

Tastas Irratia — Wed, 10 Sep 2008 10:29:45 +0000

Udaostean indarberrituta itzulita, Kaleko Bentanieko kideok (Tas-Tas Irratiko euskarazko magazina) denboraldi berriari ekingo diogu. Aurrekoetan bezala, astelehenetik ostiralera, arratsaldeko 17etatik 18ak arte egongo gara, eta aurrekoetan bezala, denboraldi honetan ere gizarte mugimenduek antolatzen dituzten ekitaldien berri ematen saiatuko gara, baina beste osagaiak ere egongo dira: ikerkuntza (Ahoztar Zelaieta kriminologoaren eskutik), zinema, literatura, umorea… eta askoz gehiago. Irailaren 15an osagai hauekin batera, denboraldiari hasiera emango diogu.

Zorionak eta mila esker!!!

Tastas Irratia — Tue, 02 Sep 2008 09:34:15 +0000

Aurten lehenengo aldiz Tas-Tas Irratiko historian, irrati honek txozna bat izan du Bilboko Aste Nagusian. Aste Nagusi osoan zehar, Bilboko Arenalean, San Nicolas elizaren aurrean, ikusgai izateko aukera izan dugu, Zaratas konpartsaren bidez. Denetariko momentuak egon dira: dibertigarriak, tentsiokoak, angustiadunak… baina emaitza ezin da pozgarriagoa izan. Azpimarratzekoa da, era berean, Gora Mari Jaia! Bilboko Konpartsen irratsaio berezia emititu dugula Aste Nagusi osoan zehar , eguerdiko 14etatik arratsaldeko 16ak arte. Gonbidatu eta gai ugari izan dugu: Martxelo Otamendi, Aitor Elizegi eta Ixabel Isazelaia aurtengo Aste Nagusiko pregoilari eta txupinera, Xabier Silveira, Uxue Alberdi, 1983. urtean izandako uholdeen urteurrena, konpartsen ekitaldiak…

Gutariko askoren amets hau ez zen errealitate izango txoznan era batean edo bestean (txoznaren eraikuntzan, diseinuan, txoznen txandetan edo txozna deseraikitzen) parte hartu duzuen guztion partehartzerik gabe. Horregatik, Tas-Tas Irrati Libreak zuen esfortzua eta dedikazioagatik bihotz bihotzez eskerrak eman nahi dizkizue. Zuek izan barik, irrati hau ez litzateke gauza bera izango.

Emakumeon aurkako erasoen aurkako kanpaina eta Kalejira antinuklearra, Gora Mari Jaia! irratsaioan

Tastas Irratia — Wed, 20 Aug 2008 09:30:41 +0000

Bilboko Aste Nagusi osoan zehar, Tas-Tas Irrati Librea Aste Nagusia Irratia bilakatuko da, Gora Mari Jaia! Bilboko Konpartsen irratsaioari lekua uzteko. Asteazken honetan, Emakumeon aurkako erasoen aurkako kanpainari buruz hitz egingo dugu, Mamiki konpartsako kide batekin. Honetaz gain, Bizizaleak konpartsako kide batekin, arratsaldeko zazpietan burutuko den kalejira antinuklearrari buruz ere hitz egingo dugu.

AHTaren aurkako akanpada, Kaleko Bentanien

Tastas Irratia — Mon, 21 Jul 2008 17:55:19 +0000

Uztailaren 24an, Zaldibian, AHTaren aurkako Asanbladak antolatutako AHTaren aurkako akanpada hasiko da. Aurreko urteotan ez bezala, aurtengo akanpadak ez du iraupen mugaturik izango, hamar eguneko topagune honen bidez AHTren obren erresistentzia-gune baten sorrera bultzatzea baita Asanbladako kideen asmoa. Ekitaldi honetaz hitz egiteko, Kaleko Bentanien (astelehenetik ostiralera, arratsaldeko 5etatik 6retara) astearte honetan, hilak 22, AHTaren aurkako Asanbladako Hilario Manzanedo izango dugu.