Xorroxin irratiaren egoitza parean dagoen belaian burutuko da zozketa, erran bezala Uztailaren 26an, igandearekin atsaldeko 5etatik aitzinera. Belaia 4000 laukitxotan banatuko dugu. Bakoitzak 50×50 zentimetro izanen ditu. Guztira 50 lerro eta 80 zutabe. 4000 laukitxo hauek salgai jarriko dira, boleto batzuk aterako ditugu eta eskualdeko ostatu eta komertzio aunitzetan izanen dira salgai. Eskualdeko herrietan bakarrik jarriko dira salgai, dena den, Xorroxin Irratira deituz gero eskuratu ahal izanen dira. Laukitxo bakoitzak, boleto bakoitzak 5 euro balioko ditu, nahi adina eros daitezkeelarik. Boleto hauek uztailaren 26a arte gorde behar dira, egun horretan eginen baita zozketa berexia.

Sariak banatzeko hautatutakoak 3 behi izanen dira. Izan ere, 3 sari banatuko dira. Edo hobe erranda, 3 pak, sari bakoitzak gauza bat baino gehiago izanen duelarik. 3 behi eta 3 sari, beraz behi bakoitzak sari bat banatuko du. Baina, nola? Argi dago, behikaka.com izena duenez, behiaren kakak erabakiko du zein den irabazlea. Behiak kaka egiten duen laukitxoaren jabea izanen da sariaren irabazlea. Dudak sor daitezke, ze laukitxotan egin du kaka, non hasi eta bukatzen da kaka,….guztiak argitzeko arauak idatzita daude, eta 3 epaile arduratuko dira epaia emateaz. Eta kaka egiten ez badu? Hori ere arauetan ageri da.

Argi dago, zozketa honen helburuetako bat dirua biltzea dela, laguntza ekonomikoa jasotzea dela, dena den, ez da soilik hori izanen. Egun hortan berean, uztailaren 26an, besta ttiki baten moduan planteatuko dugu zozketa, musika, zuzeneko irratsaioa, bertsolariak, jokaldi hoberenen komentarioak…izanen ditugu, eta tragoxkaren bat hartzeko ostatua ere.

Kamisetak ere atera ditugu, espreski zozketa berexi honetarako, Xorroxin irratian berean, edota hainbat puntutan salgai izanen dira, haur eta helduendako.

Ez da zozketa puntuala izanen, ez dugu aurten bakarrik egiteko intentzioa, urtero egiteko asmoa dugu.

Informazio osotua www.behikaka.com web orrialdean.

 manifa bukaeran irakurritakoa;

Zazpi hilabete eta erdi pasatu dira toki honetan berean ERDIZ BIZIRIK oihukatzera bildu ginenetik. Bilkura hunkigarria izan zen hura. Orduan, gaur bezala, ehunka baztandar helburu bakarrarekin elkarturik: gure lurra babestea. Manifestazioaren arrakasta ikusirik, batzuk harritu egin ziren. Ez gara baztandarrak horrelakoetara usatuak. Baina, bazkaleku bikain hau suntsitu nahian dabiltzalarik, nola etxean gelditu? Gure mendialderik ederrena arrisku gorrian delarik, nola isilik egon? Nola ez defenditu gure eta gure seme-alaben ondarea?

Baztanen ardura handiko erabaki bat hartu behar da. Hortarako Herri galdeketa nahi dugu. Hara zer gauza xinplea eta ederra!

Erreferenduma egiteak, baztandar guztiek, afera honi buruz erabakiko dugula erran nahi du. Baztandarrek edukiko dugula harrobiari buruzko azken hitza. Ez da gutiagorako! Harrobia Baztango herri-lurretan eginen baita, DENENAK DIREN LURRETAN

Harrobia egin nahi duen enpresari lurpean dagoen gaia baino ez zaio interesatzen. Gainerako guziak, bazkalekua, errekak, oihana, baserritarrak, hemen bildurik gaudenak, trabak baino ez gara. Saihestu beharreko trabak. Traba egiten dugu Erdizaga gurea delako. Nekazari izan edo ez, paraje hori maite dugulako. Badakigulako, inoren azalpenik gabe, toki paregabe eta balio haundikoa dela. Eta, traba egiten baitugu, gure izen ona zikintzen saiatzen dira. Eskumakil prestuek dauzkate horretarako.

Erdizagako harrobia “ Aldude mendiko” ZECaren kontrako eraso bortitza izanen litzake: lehentasunezko habitatak betiko suntsituak, mendiko nekazaritza egurtua, Erdizaga errekako ura kutsatua, Urtzelgo erreka xehatua, Erregerenako pagadi zoragarria zazpi kilometroan urratua, paisaia xarmantak itxuragabetuak…Beraz dei egiten diogu Nafarroako Gobernuko Ingurumen Sailari, leku honen balio naturalak defenditzeko daukan konpromisoa bete dezan eta harrobiaren proiektuari ezezko garbia eman diezaion.

Baina pilota bertze teilatu batean ere dago. Afera honek aitzinet segitzen badu Baztango Udalera ailegatuko zaigu eta orduan hemen erabaki bat hartu beharko da. Gure herrietako 5 alkatek Erreferenduma deitzeko hartu duten erabakiarekin, afera hau goxoki eta modu garbian konpontzeko bidea edeki digute. Bide honek erran nahi du, Baztandar guztien artean erabakiko dugula. Egun bat finkatuko dugula eta egun horretan, denek, harrobiaren aldeko edo kontrako botoa ematen ahalko dugula. Hau, legeak agintzen duen bezala, informazio kanpaina baten ondotik burutuko da.

Baina doike, denek ez dute uste bera. Iduriz, Baztango agintari eta buruzagiek, herriaren gainetik daudela uste dute. Azkeneko Junta Jenerala horren erakusgarria da; eguneko gaien zerrendan heldu ez zen hondar momentuko proposamena nolanahi ere bozkatuaraziz, afera Iruñekoen erabakiaren eskuetan uzteko!!

Zer gertatzen da hemen? Baztango erabakiak Iruñen hartu behar badira zertarako junta jenerala eta udaletxea? Zeren beldur dira?

Aspertuak gaude beldurraren aitzakia aditzeaz: ezetz erranez geroz MAGNAk errekurrituko duela, Nafarroako Gobernuak harrobia inposatuko duela…Honezkero bada ordu, Baztango Balleko Etxean ilusio eta ausardiaren hazia ernatu dadin. Ilusioa Erdizagaren alde lan egiteko. Ausardia baztandarren nahia nonahi eta nornahiren aitzinean defenditzeko.

Jakin, badakigu bide luze eta zaila izanen dela. Eta bide honetanErdiz maite dugun guzien eginahala beharrezkoa izanen da. Lan egin dezagun bada elkarrekin: zintzoki eta azpijokorik gabe. Ilusioz eta ausardiaz.

ERDIZ GUZTIENA DELAKO

KONPONBIDE HOBERENA DELAKO

DENEN ARTEAN ERABAKI DEZAGUN

ERDIZ ERREFERENDUMA

ERREFERENDUMIK GABE ERABAKIRIK EZ

audioak, www.xorroxin.com 

Gaurko prentsaurrekoaren deialdia, Erdizi buruzko erabakia, herriak erreferendumaren bidez hartu dezala, eskatzeko da.

Horretarako azaroaren 10ean, arratsaldeko 4terdietan Elizondoko plazatik aterako den manifestaldira deitzen zaituztegu.

Azkeneko denboraldian Baztango Udaletxearen aldetik iruzurra eta tranpa bertzerik ez dugu ikusi. Urriaren 1ean NaBai-ren proposamena onartu izan balitz, udalaren aldetik Magnak argi berdea edukiko luke bere proiektua aitzina eramateko, inongo akordio idatzirik eduki gabe, eta gainera herriarekin kontsultatu gabe. Hortaz gain, aste hontan, Gobernu Batzordea osatzen zuten zinegotziek ezezkoa eman diote larunbatetan sinadura biltzeko langile bat jartzeko eskaerari. Eskaera hau alkate-juradoek egina zen. Hau omen da beraientzat “demokratikoena”. Hau al da Baztandarrok nahi duguna ?

Honengatik, herri gladeketa ofizialaren bidez herriari hitza itzultzea eskatzen dugu. Herri galdeketa honek 27/2002 Lege Foralaren kondizioak bete beharko lituzke. Kondizio hauetan kanpaina informatiboa sartzen da. Galdeketa honen emaitza jakin ondoren, Batzar Orokorrak herriaren erabakia beregain hartu dezala eskatzen dugu. Hau da, erabaki hau edozeinen aitzinean defenditzea, legez dagokigun bezela, Erdizagako lur komunalaren jabeak izateagatik.

Gaia hórrela egonda, jende guziaren partehartzea guziz beharrezkoa da, bai sinadurak biltzeko udaletxean, bai manifestazio egunean, eta bai ondoren eginen diren ekintza guztietan.

Apostua haundia da, eta udalaren jarrera zalantzagarria. Horregatik azaroaren 10ean atsaldeko 4terdietan denak Elizondoko plazara !

honen berri gehiago www.xorroxin.com

Gaurko albistegian berri bat dugu nagusi. Bertze berriak bazterrean utzi gabe, noski, eta narzisismoan erortzeko arriskua hartuz dena den. Berri historikoa, zenbaitetan ere historia eta histeria uztartu dituena. 26 urteko historian, dudarik gabe 2007ko urriaren 15 hau Xorroxin irratiarendako egun garrantzitsua da. Lehenbiziko aldiz, egoitza propiotik ari da solasean irrati xume hau, hainbertze jenderen neurrigabeko esfortzu eta grinari esker bere bidea egiten ari den irrati herritar hau. Etxe berria, propioa estreinatzen ari gara. Gibelean gelditu dira hainbat egoitza. Kilometroak egin ditu Xorroxin irratiak. Han eta hemen bizi izan da, beti ere etxe guzietako xokoetan egoteko intentzioarekin. Erratzuko eskolan eman zituen bere lehenbiziko pausuak. 1981eko martxoaren 19an uhineratu zen lehen aldiz, jende langile eta ameslari baten gogo eta lan haundiari esker, ametsak bideratuz. Beti ere irrati xume eta herritarraren xedea bazterrean utzi gabe, urtez urte, errotuz joan da Xorroxin irratia. Dena den bidea ez da laua izan. Malda aunitz, oztopo aunitz aurkitu ditu bere bidean, baino jendearen ilusioa guzti horren gainetik egon da beti eta 26 urteko ibilbideak ederki aski erakusten du hori. Euskal Herriko irrati euskaldunik aintzinakoena da Xorroxin. Aintzinakoena, ez zaharrena, izan ere gazte mantentzen baita, sugeak bezala, azala berritzen baitu eguneroko solasari esker, entzuleen partehartzeari esker, norbanakoen hatsari esker. Erran bezala, Erratzun hasi zen, eta gaur, Elizondon, Aita Donostia karrikan bere etxetik ari da solasean Xorroxin irratia. Dena den, 26 urteko historia honetan, etxebizitza aunitz ezagutu ditu Xorroxinek. Erratzuko eskolatik Elizondoko Fortenea ostatura egin zuen salto; Elizondo utzi gabe, gero Saskaitz plazako egoitza ezagutu zuen. Ondotik Iruritako etxe batetik solastu zen denbora batez, eta azken urteak Elizondoko San Frantzisko Xabier ikastetxeko etxe eskolatik egin ditu bere emankizunak. 5 egoitza ezagutu ditu beraz irrati herritar honek. 6. bat ere ezagutu beharra zuen dena den, halabeharrez, eta irratia koxkortu denez, gaztea denez, ilusioa duenez, lana egiteko gogoz dagoenez, entzulego finaren hauspoa somatzen duenez, egoitza propioa izateko hautua hartu du. Erabakia hartu eta burutu. Esfortzu haundia egin beharko da. Ez da lanik faltako. Momentu gogorrak ere igaroko ditu, baino, beti bezala, herriari esker, konpromezuari esker aitzinet aterako da gure irrati hau, guztion irrati hau, Xorroxin irratia.

Gaur Nafarroako irrati euskaldunen sarea aurkeztu nahi dizuegu; Nafarroako Irratiak izenpean gauzatu dugun proiektua. Gaur plazaratzen dizuegun egitasmoa euskararen biziberritzearen alde egindako elkarlanaren ondorioa da. Nafarroa Garaian une honetan euskaraz dihardugun sei irrati gaude, Xorroxin, Beleixe, Esan Erran, Karrape, Aralar eta Euskalerria irratia. Bakoitzak lan esparru, zabalpen eremu eta oro har ezaugarri ezberdinak ditu, baina oinarrian komuneko ardatza; euskara eta hizkuntzaren normalkuntzaren aldeko lana irratigintzaren berezko baliabide guztiak erabiliz.

Komunikazio eta informazioaren aro honetan, tokian tokiko irratiok geure baliabide eta ezaugarri propioekin, eguneroko jardunean euskal hiztunen komunitatearen sendotzeko egiten dugun lana bateratu dugu eta etorkizunerako erronkari elkarrekin helduko diogu. Horrela, sare eraginkorra eratzea izan da eman dugun urratsa eta gaur aurkezten dizueguna. Programazioa bateratua bultzatu, elkarlana sustatu, esparruak zabaldu nahi ditugu ahalik eta eremu handienera iristeko, sistema komuna martxan jarri eta gure ekoizpena ahalik eta modu egokienean gauzatu nahi dugu.

Dagoeneko bi urte igaro dira lehen bilkurak egin zirenetik eta jadanik bide honetan lehen urratsak egin ditugu. Orain dena martxan dagoela, ahaleginak merezi duela esateko moduan gaude. Epe ezberdinak finkatu ditugu saretzea abian jartzeko; irratien teknologien eguneratzea eta digitalizazioa izan dira lehen pausoa eta behin hori beteta gure zabalkundeari eta programazio trukaketari helduko zaio. Webgunea izanen da gure erakusleiho eta elkargune nagusia. Bertatik irrati bakoitzak bere inguruko berriak, gaiak, foroak, argazkiak, audioak… izateaz gain egindako irratsaioak interneten zintzilikatzeko aukera izanen du, modu horretan beste irratiek eskuragarri izanen dute programazio trukaketa ahalbidetuz. Baina ez hori bakarrik, edozein erabiltzailek ere izanen baitu aukera gure web guneak bisitatu eta gure irratsaioak entzuteko. Orri nagusi bat izanen dugu www.nafarroakoirratiak.com izenarekin eta hortik aurrera irrati bakoitzak berea.

www.esanerran.com

www.xorroxin.com

www.euskalerriairratia.com

www.aralarirratia.com

www.karrape.com

www.beleixe.com.

Etorkizunari begira online emititzeko aukera aztertzen ari gara eta hurrengo pausoa hori izanen da, programazioa eta eduki trukaketa bultzatzen dugun bitartean, denontzat aberasgarri izango den bultzada eman nahi dugu, elkarlana eta hurbiltasuna ezaugarriak irratietan dihardutenentzat zein entzuleentzat onuragarri izan daitezen.

Elkarlana, hurbiltasuna, gertutasuna eta eguneroko bizitzan euskararen presentzia bermatzeko eta sustatzeko ahaleginak egiten jarraituko dugu Nafarroako irrati euskaldunek saretze prozesu honetan.

Hau gauzatzeko Euskara Elkarteen Topagunearen laguntza ezinbestekoa izan zaigu, ideiaren garapena eta gestioan egindako lana erabakiorra izan da proiektua martxan jarri eta garapenerako. Jakina, Udalbideren diru laguntzarik gabe hasierako ideia, xedea errealitate bilakatzea ezinbestekoa izanen litzaiguke. Hortaz eskerrak ere Udalbide eta Topaguneari eskainitako laguntzagatik.

Kartelaren izenburua “Ni behia, eta zu zer zara?” da eta bere egilea Siscu Simón Rivera (Manresa, 1.982). Sortzez eta bihotzez katalana, 21 urtekin Elbetera etorri zen bizitzera eta gaur egun Huarten bizi da nahiz eta Baztanekin oraindik harreman handia mantendu. Duela hiru urtetik Iruñeko BERMER&CO diseinu enpresan egiten du lan .Epaimahaia aurreko ostiralean bildu zen eta honako hauek osatu zuten:- Itziar Mena, diseinugile eta argazkilaria (Foto Mena)
- Totu Iturzaeta, diseinugilea (Kulturkari)
- Amaia Iturralde (iazko kartelaren egilea)
- Gotzone Sanzberro eta Jexux Baylon (Baztandarren Biltzarreko Marketing)

Bertsolari Txapelketa gehien irabazi duen bertsolaria da Xabier Silbeira, bere bortzgarrena jantzi baitzuen Lur dantzalekuan.
Ez zuen saio biribilik egin, puntuazioa ere aurrekoetan baino apalagoa lortu zuten ia bertsolari guztiek. Bukaeran, duela hamar urteko agur bera kantatu zuen, preso, iheslari eta sasian daudenei eskaini baitzien txapela Silbeirak. Dena den, Silbeirak agurreko 2. bertso bat ere bota nahi izan zuen, aurten txapelketan parte hartzerik izan ez duen Estitxu Arozenari eskeini zion txapela, hunkiturik.
giro bikaina bizi izan zen Elizondon. lur dantzalekua lepo bete zen. hasieran bertsolariak urduri xamar zeudela nabaritu zen, huts batzuk ere izan zituztelarik, dena den, saioa aitzinet joan ahala, bertsolariak hobe aritu ziren, eta zaleak ere animatu egin ziren.

SAILKAPENA:
Xabier Silveira 417′5
Jon Barberena 399,5
Iñigo Olaetxea 396
Erika Lagoma 396
Julen Zelaieta 386
Joxe Juan Zubieta 382
Miel Mari Elosegi 364,5
Bittor Elizagoien 354.5

hona hemen Silbeiraren 2 agurrak:

4_silbeira1.mp3

Erdiz bizirik! Eskatzeko sekulako manifestazio edo herria itzulia egin zen larunbatean (martxoaren 24ean) Elizondo herrian.
Ehunen bat abelbururekin ,behi eta behorrekin, hasi zen herri itzulia. Izan ere 1500 abelbururen bazkatokia baita Erdiz. Leku babestu honetan (LIK) eta (ZEK), euskal herrian dagoen harrobirik haundiena egin nahi baita. Bukaeran, komunikatu bat irakurri zen Baztango Udaletxearen jarrera eta ixiltasuna salatuz, eta gai honen inguruan eta erabakia hauteskundeak baino lehen har dezan eskatuz. Aldi berean, manifestazioarekin afera ez dela gelditu eta afera luzea denez, denen laguntza eskatu zuten. Adituak kontratatu nahi direnez, hemendik gutxira, kontu zenbakiak irekiko dira jendeak dirulaguntza eman dezan.
Erdizko batzarra jende eta ideología desberdinaz osaturik dago eta hori behin baino gehiagotan azpimarratua izan zen. Horretaz landa, sinadura bilketa eskatu zen akaberan, baztango herritarrei, soilik, eskatu zitzaien sinadura. Honekin erakutsi nahi baita hemengo herritarren kezka eta nahia. Sinadurak eta biltzen segituko dute, herriz herri.
1500 herritar baino gehiago elkartu ziren, Elizondon, egin den manifestaziorik haundienean. Kolore, eta adin nola lanbide desberdinetako herritarrak bildu ziren, magnesitas de navarra enpresak egin nahi duen harrobiari ezetz errateko.

komunikatuaren audioa entzungai www.xorroxin.com audioak- elkarrizketak atalean

Bertsolari bakotxak burutu beharko duen lana hauxe izanen da:

Zortziko haundian binaka gaia emanda 3na bertso
Zortziko txikian binaka 3na bertso
Sei puntuko motzean binaka ofizioka 3na bertso
Kartzela: puntua emanda bi bertso 8ko txikian eta gai bati bi bertso nahi den doinu eta neurrian.

Lan guztiak burututa, lehen bi bertsolarien artean 5 puntu edo guttiagoko aldea baldin badago, bi bertsolari hauek desenpatea jokatuko dute, eta lan gehigarri hau egin beharko dute:

Hamarreko txikian binaka 3na bertso
Kartzela: gai bati hiru bertso nahi den doinu eta neurrian.

Azken aldi hontan Magnak Erdizko parajean harrobia egiteko duen egitasmoaren inguruan solas aunitz egin da. Karriketak jendearen artean kezka da nagusi eta Baztango udalak bere jarrera publikoki ez agertzeak ez du batere laguntzen bantandarrok dugun ezinegona baretzen.

Erdizko Batzarrearen aldetik harrobiaren proiektua bertan behera gelditzeko arrazoiak gizarteareatzearekin batera, Baztango hamabortz herrietan batzar informatiboak egin ditugu, herritarrak informatu eta beren kezken berri jakiteko. Batzarrak arras partizipatiboak izan dira eta honen inguruan irakurketa arras positiboa egiten dugu borroka honetan herriaren iritzia balio haundie daukalako guretzat. Bitartean baztandarroko Magnaren bertze trikimailu salagarri baten testigu izan gara. Gure etxeetara iritsi den Magnaren propaganda hain zuzen ere. Horren arabera Erdizko harrobia parke natural bat izango balitz bezala saldu nahi digute. Etorkizunik ez dugula harrobirik gabe,… penagarria.

Azkeneko gertakari hauek direla medio Erdizene aldeko batzaretik karrikara ateratzea erabaki dugu. Baztandar guztiok batera harrobiaren proiektuari gure ezetza adierazteko eta gai honen inguruan herritarren iritzia kontutan hartu eta errespetatzeko.

Horretarako martxoaren 24ean atsaldeko 4 etan ERDIZ BIZIRIK lelopean Elizondoko plazatik aterako den manifestazioa edo herri itzulian parte hartzeko gonbitea luzatu nahi dizuegu.

Manifestazioa ahalik eta partehartzaileagoa izateko helburuarekin Baztango gizarte eragileen atxikimenduak bildu ditugu. Gaur arte bildutakoak hauek dira :

BAZTANDARREN BILTZARRA ELKARTEA

BAZTAN-ULTZAMAKO RUGBILARIAK

Eskualdeko LAB sindikatua

LEKAROZKO LEGATE ELKARTEA

BAZTANGO MENDIGOIZALEAK

EHNE

ERRATZUKO KULTUR ELKARTEA

JO ALA JO KULTUR ELKARTEA

ELIZONDOKO GAZTETXEA

TXARUTA PILOTA ELKARTEA

BAZTANGO AEK

ASKATASUNA

GAZTELU ABESBATZA

BAZTANGO GAZTE ASANBLADA

METAZIRI aldizkaria

BAZTANGO EZKER ABERTZALEA

Gai honetan herritarren partehartzea ezinbertzekoa baita martxoaren 24ean atsaldeko 4etan Elizondoko plazan ikusi nahi zaituztegu. Denen artean harrobia geldituko dugu.

ERDIZ BIZIRIK !!

afera honen inguruko elkarrizketa www.xorroxin.com audio biltegi, elkarrizketa atalean duzue, entzuteko eta jeisteko.

     erdizko-iragarkia.mp3